विराटनगर । मंसिर ४ गते हुने निर्वाचनमा सबैले धेरै चासोका साथ हेरेको क्षेत्रमध्ये मोरङ क्षेत्र नं. ६(१) पनि हो । प्रदेश १ को चर्चामा रहेको निर्वाचन क्षेत्रमध्येको एक हो । जहाँ सत्ता गठबन्धनबाट माओवादी केन्द्रका युवा नेता जीवन आचार्य र एमालेबाट रीता न्यौपाने चुनावी मैदानमा छन् ।
मोरङ ६ मा सत्ता गठबन्धनबाट प्रतिनिधिसभा उम्मेद्वार शेखर कोइराला सहज अवस्थामा हुँदा प्रदेशसभाको चुनावी प्रतिष्पर्धाको अवस्था के छ भन्ने बुझ्न न्यूज विराटले मोरङ ६ प्रदेशसभा क्षेत्र नम्बर १ का १०५ जना मतदातासँग प्रत्यक्ष भेटेर कुराकानी गरेका छौं । हामीले भेटेर कुराकानी गरेका मतदाताहरुको मन र मत अनुसार हामी गठबन्धनका उम्मेद्वार जीवन आचार्य सजिलै विजयी हुने ठहरमा पुगेका छौं ।
हामीले कुराकानी गरेका १०५ जना मतदातामध्ये आचार्यलाई भोट दिन्छु भन्नेहरू ४३ जना अर्थात् ४० दशमलव ९५ प्रतिशत छन् । जबकि एमाले उम्मेद्वार रिता न्यौपानेलाई मत दिन्छु भन्नेहरू २९ जना अर्थात २७ दशमलव ६१ प्रतिशत मात्रै छन् ।
यसबाहेक ८ जना अर्थात् ७ दशमलव ६१ प्रतिशतले स्वतन्त्र उम्मेद्वारहरुलाई मत दिने बताउँदा २० जना मतदाता अर्थात १९ प्रतिशत मतदाताले कसलाई मत दिने टुंगो गरिनसकेको बताए ।

माथिको यो आँकडाले देखाउँछ यो क्षेत्रमा माओवादी उम्मेद्वार आचार्यले यसपालि निर्वाचन जित्ने बलियो सम्भावना छ ।
खासगरी सत्ता गठबन्धनका दलहरुको मत, सांसद नहुँदै पनि स्थानीय क्षेत्रमा विभिन्न विकास आयोजनाहरु ल्याउन गरेको भूमिका तथा माओवादी केन्द्रमा बलियो पहुँचका कारण पनि आचार्यको प्रभाव बढेको देखिन्छ । उनको तुलनामा एमाले उम्मेद्वार न्यौपाने निजी स्कुल चलाएर व्यवसायमा व्यस्त रहेको र स्थानीय क्षेत्रमा राम्रोसँग घुलमिल नभएको मतदाताहरुको भनाइ छ । ‘आचार्यले अघिल्लोपटक चुनाव हार्दा पनि क्षेत्रको विकासका लागि निरन्तर सक्रियता देखाएको पाइएको छ’, सुन्दर हरैंचा ५ का वासुदेव शिवाकोटीले भने ‘यहाँको बाटोघाटो, ट्रान्सफर्मर, खेल मैदान लगायतका काममा उनले १६ करोड बजेट ल्याउन सके । हामीले यस्तै काम गर्न सक्ने, अग्रसरता देखाउन सक्ने जनप्रतिनिधि रोज्ने हो ।’

मतदाताहरुको मुड मात्रै होइन, राजनीतिक गणितले पनि आचार्यलाई यसपटक सेफ जोनमा पारेको छ । नेपाली काँग्रेस, माओवादी केन्द्र, एकीकृत समाजवादी , लोसपा लगायतका दलहरुको गठबन्धन यहाँ छ । यसबाहेक केही समयअघि मात्रै एमालेमा प्रभावशाली भूमिका राख्ने नेता बलभद्र सरदारसहितको टिम माओवादीमा प्रवेश गरेको छ । कुनैबेला एमालेमा राम्रो होल्ड भएका नेता कासिम मिया पनि अहिले एकीकृत समाजवादीमा क्रियाशील रहेर गठबन्धनका सक्रिय छन् ।
सत्ता गठबन्धनका उम्मेद्वार आचार्यलाई अनुकूलता थपिएका बेला एमाले उम्मेद्वार न्यौपानेलाई भने एमालेभित्रैको मत पनि पूरापूर आउने सम्भावना कम देखिएको छ । हामीले कुराकानी गरेका १०५ मध्ये २९ जनाले न्यौपानेलाई मत दिने बताउँदा पहिल्यैदेखि एमाले रोज्दै आएकाहरुले पनि यसपटक एमाले नरोज्ने बताएका थिए ।
‘हामी त जन्मै एमालेमा भएको हो’, सुन्दरहरैंचा ५ का लक्ष्मीप्रसाद अर्यालले भने ‘तर, यसपटकदेखि एमालेलाई मत नदिने निधोमा पुगेका छौं । यति ठूलो मत पाउँदा पनि उसले गएको पाँच वर्षमा काम गर्नुभन्दा देशमा भाँडभैलो सिर्जना गर्ने काम मात्रै गर्यो । यसकारण पनि अब एमालेलाई मत नदिने हो ।’