विराटनगर। मोरङको जहदा गाउँपालिका–३ मा रहेको मिठाई बनाउने उद्योगमा पाइप विष्फोट हुँदा दुई जना कामदार घाइते भएका छन् ।
निर्माणाधीन अवस्थाको कोसी विराट एग्रो प्रा.लि नामक मिठाई बनाउने फ्याक्ट्रीमा मेसिन जडान गर्ने क्रममा मंगलबार साँझ ७ः४५ बजेतिर पाइप विष्फोट भएको थियो ।

मोरङ प्रहरीका प्रवक्ता डिएसपी दिपक श्रेष्ठका अनुसार घटनामा परेर सप्तरीको विष्णुपुरका ३३ वर्षीय कृष्णकुमार साह र सप्तरी तिरुपका ४२ वर्षीय महेन्द्र साह घाइते भएका छन् ।

घाइते दुवै जना निर्माणाधीन फ्याक्ट्रीका कामदार हुन् । घाइतेमध्ये कृष्णको अवस्था गम्भीर छ । उनको शरीरका विभिन्न भाग पिल्सिएको प्रहरीले जनाएको छ । महेन्द्रको अवस्था सामान्य छ ।

दुवै जनाको विराटनगरस्थित विराट नर्सिङ होममा उपचार भइरहेको छ । प्रहरीले घटनाको अनुसन्धान सुरु गरिएको जानकारी डिएसपी श्रेष्ठले जानकारी दिए ।