झापा । प्रदेश १ को तराइको तीन जिल्लामध्ये सबैभन्दा ठुलो सीमा नाका रहेको झापामा तस्करी धन्दा मौलाएको छ । १ सय ६३ किलोमिटर सीमा क्षेत्र रहेको झापामा प्रहरीले तस्करीको लाइन दिएको कारणले खुलेआम तस्करी हुने गरेको पाइएको हो ।

विशेष गरी राती र बिहानको समयमा झापाको काकरभिट्टा, मेचीनगरपालिका – ६ को तुर्केनी फुटबल ग्राउन्ड, दुर्गा मन्दिर छेउ, इलाका प्रहरी कार्यालय काकरभिट्टाको उत्तरपर्टी रहेको नाका नगकलबन्दा जाने हडीकसम नाकाबाट खुलेआम तस्करी हुने गरेको स्थानीयले बताएका छन् । उक्त नाका औपचारिक रूपमा तस्करीमा प्रयोग भएको पाइएको छ ।

तस्करी धन्दामा लागेका गिरोहले यी नाकाहरूबाट भारतबाट कपडा र खाद्यजन्य सामाग्रीहरू ल्याउने गरेका छन् । नेपालबाट भारत तीर सुपारी, चाइनिज स्याउ तस्करी हुने गरेको छ ।
तस्करी धन्दामा लागेका झापाका श्याम थापाले नगकलबन्दाको हडीकसम र तिरिङ खोलाको नाका, राजन खड्काले चर्च नाका जिम्मा लिएर अहिले भारतबाट तस्करीको कपडा ल्याउने गरेका छन् । यस्तै रामे राय र बिरे लिम्बुले पनि कपडाको क्या रिङ गर्दछन् । उनीहरूले इप्रका काकरभिट्टा देखि बि ओपी काकरभिट्टा र जिल्ला प्रहरी कार्यालयसम्म मिलाएर पिक अप भ्यान र साइकलमा कपडा राखेर तस्करी गर्दछन् । शनिवार राती भारतबाट तुर्केनी नाका हुँदै तस्करी भएको भिडियो न्युज विराटले फेला पारेको छ । तस्करी धन्दामा लागेका गिरोहले भारतबाट रातीको समयमा तुर्केनी नाका हुँदै चर्चमा ल्याएर भण्डार गर्दछन् । त्यसपछि त्यहाँबाट पिक अप भ्यानमा कपडा हालेर झापाको बिर्तामोड, दुलारीबजारसहित मोरङको उर्लाबारी देखि सुनसरीको इटहरीसम्म तस्करीको कपडा पुग्ने गरेको छ । रातीको समयमा दुई दर्जन बढी भरियाले साइकलमा कपडाको बोरामा ल्याएर तुर्किने नाका हुँदै चर्चमा ल्याएर राख्ने गरेका छन् । पिक अप भ्यानमा १९ देखि २२ बोराको पोका बनाएर लोड गरेर लैजाने गरेका छन् ।

विगत लामो समयदेखि औपचारिक रूपमा तस्करीको लाइन सञ्चालन नभएको झापामा अहिले तस्करीजन्य गतिविधि एकाएक बढेको छ । विगत एक महिनायता तस्करी धन्दा बढोत्तरी हुँदै चरम अवस्थामा पुगेको छ ।

सीमा सुरक्षाका लागि खटिएको प्रहरी टोलीले बेला बेला दुई चार बोरा कपडा र अन्य सामान बरामद गरे पनि दैनिक सयौँको सङ्ख्यामा साइकलमा बोरोको बोरा कपडा नेपाल आउने गरेको सीमा क्षेत्रका स्थानीयहरूले जानकारी दिएका छन् । स्थानीयले प्रहरीसँगकै मिलेमतोमा तस्करी सुरु भएको दाबी गरेका छन् ।
यी सीमा नाका नजिक इप्रका काकरभिडा छ भने नजिकै सशस्त्र प्रहरीको सीमा सुरक्षा पोस्ट (बि ओपी) अवस्थित छ । तर, तस्करहरूले सुरक्षाकर्मीको पर्बाह नगरी दिनहुँ दजर्नौं सङ्ख्यामा साइकलमा बोरा भित्र कपडा राखेर तस्करी गर्दै आएको स्थलगत रिपोर्टिङका क्रममा पाइएको छ । यहाँका एक जना स्थानीयले दिएको जानकारी अनुसार विगत एक महिनादेखि नियमितरुपमा तस्करीको लाइन चलिरहेको बताए ।
‘साँझ पर्नै हुँदैन ७ बजेदेखि दर्जनौँ साइकल र पिक अप भ्यान लाइन लाग्छन् र कपडा ओसार्न थाल्छन्,’ एक जना स्थानीयले भने ।

तुरर्केनी, दुर्गा मन्दिर नाका तस्करको कब्जामा
श्याम थापाले नगकलबन्दाको हडीकसमर तिरिङ खोला र राजन खड्काले चर्च नाक जिम्मा लिएर अहिले भारतबाट तस्करीको लाइन चलाएका छन् ।

उनीहरूले सशस्त्र र जनपद प्रहरी मात्र होइन भारततर्फको सुरक्षा निकाय (एसएसपी) समेतलाई मिलाएर तस्करी लाइन सञ्चालन गरेका छन् । सशस्त्र र जनपदका दुवै डिआइजी र एसपी मिलाएको छु, कुनै डर मान्नु पर्दैन भनेर खुलेआम तस्करी गर्ने गरेको यहाँका स्थानीय बताउँछन् ।

यता जिल्ला प्रहरी कार्यालय झापाका प्रमुख एसपी विश्वमणि पोखरेलले सीमा क्षेत्रबाट हुने चोरी तस्करी रोक्न लागि परेको बताए । तस्करी र अन्य गलत क्रियाकलाप गर्नेलाई प्रहरीले नछोड्ने उनले बताए । ‘मैले आएदेखि नै चोरी र तस्करी रोक्नदेखि गलत क्रियाकलाप विरुद्ध आन्तरिक रूपमा धेरै कारबाही गरेको छु र म यस्तो गलत तत्त्वसँग जोडिएर कुनै काम पनि गर्दिन,’ एसपी पोखरेलले भने, ‘तस्करी विरुद्ध हामी कडाइपूरक काम गर्छौँ । तर, प्रहरीलाई हचुवामै आरोप लगाउने गरेका छन्, त्यसमा भने म सहमत छैन ।’