नेपाल क्रिकेट संघ क्यानले बलात्कार आरोप लागेका नेपाली राष्ट्रिय क्रिकेट टिमका कप्तान सन्दीप लामिछानेलाई निलम्बन गरेको छ ।

बिहीबार क्यानले प्रेस विज्ञप्ति जारी गर्दै सन्दीपलाई निलम्बन गरेको हो । काठमाडौं जिल्ला अदालतबाट पक्राउ पुर्जी जारी गरेको भन्दै क्यानको कार्यसम्पादन समितिको निर्णयले सन्दीपलाई राष्ट्रिय टिमबाट निलम्बन गरिएको प्रेस विज्ञप्तिमा उल्लेख छ ।

बिहीबार काठमाडौं जिल्ला अदालतले नाबालिका बलात्कारको कसुरमा पक्राउ पुर्जी जारी गरेको थियो ।

गत भदौ ५ गते सन्दीपले नाबालिकालाई पिंगलास्थानको काठमाडौं होटल इनमा राखेर बलात्कार गरेको उजुरी छ । ५ गते दिउँसो सन्दीपले ती नाबालिकालाई घुम्नका लागि नगरकोट लगेका थिए । साँझ काठमाडौं फर्केर उनीहरू होटल इनमा बास बसेको र राति बलत्कार गरेको नाबालिकाले प्रहरीसामु बयान दिएकी थिइन् ।

यता, प्रहरीले अनुसन्धान बुधबार बाटै थालिसकेको छ । पुलिसले सन्दीपविरुद्ध महत्त्वपूर्ण प्रमाण भेटेको पनि बताइसकेको छ । भदौ ६ गते केन्या गएका सन्दीप टी–२० अन्तर्राष्ट्रिय क्रिकेट सिरिजपछि वेस्ट इन्डिज गएका थिए । अहिले उनी क्यारेवियन प्रिमियर लिग खेल्न जमैका तालावाजमा आबद्ध छन् ।