नेपालले पाँच खेलको टी–२० अन्तर्राष्ट्रिय क्रिकेट सिरिजको दोस्रो खेलमा आज (शुक्रबार) केन्यासँग प्रतिस्पर्धा गर्दैछ । बिहीबार भएको पहिलो खेलमा नेपालले घरेलु टिम केन्यालाई पाँच विकेटले पराजित गरेको थियो ।

नेपाल लगातार दोस्रो जितको खोजीमा छ । खेल दिउँसो ३:४५ बजे सुरु हुनेछ । पहिलो खेलमा १ सय ३१ रनको सामान्य लक्ष्य पाएको नेपालले चार बल बाँकी रहँदा पाँच विकेटको क्षतिमा लक्ष्य पूरा गरेको थियो ।

नेपालका ब्याटर दीपेन्द्रसिंह ऐरीले सर्वाधिक ३३ रन बनाए । आरिफ शेखले अविजित २४ रन बनाए । त्यस्तै, ज्ञानेन्द्र मल्लले २३, आशिफ शेखले १९, रोहितकुमार पौडेलले १३ रन बनाएका थिए ।

यसअघि केन्याले निर्धारित २० ओभरमा आठ विकेटको क्षतिमा १ सय ३० रन बनाएको थियो । नेपालले १२ गते तेस्रो, १३ गते चौथो र १४ अन्तिम तथा पाँचौ खेल केन्यासँग खेल्नेछ । यसपछि तीन खेलको एकदिवसीय सिरिज खेल्नेछ । पहिलो खेल भदौ १७ दोस्रो १८ र अन्तिम खेल २० गते खेल्नेछ ।