विराटनगर, ३१ असार । रोटरी क्लब अफ विराटनगर डाउनटाउनले आयोजना गरेको ‘रोटरी ट्रेड फेयर २०२२–२३’ विराटनरमा सुरु भएको छ । महिला शसक्तिकरण र आर्थिक रुपमा महिलाहरुलाई सबल बनाउन प्रत्येक वर्ष आयोजना हुँदै आएको रोटरी ट्रेड फेयर यस वर्ष पनि भव्यरुपमा सुरु भएको हो ।

रोटरी क्लब अफ विराटनगर डाउनटाउनले प्रत्येक वर्ष आयोजना गर्दै आएको रोटरी ट्रेड फेयर गत वर्ष कोरोना महामारीका कारण हुन सकेको थिएन । तर, यसवर्ष शुक्रबारदेखिसम्म दुई दिन सयौँ महिलाहरुको उत्साहजनक सहभागितामा ‘रोटरी ट्रेड फेयर २०२२–२३’ भव्यरुपमा सुरु भएको रोटरी क्लब अफ विराटनगर डाउनटाउनकी अध्यक्ष रेखा राठीले जानकारी दिइन् ।

उनले डाउनटाउनले ‘रोटरी ट्रेड फेयर विगत १४ वर्षदेखि निरन्तर आयोजना गर्दै आएको बताइन् । यस वर्षको ‘रोटरी ट्रेड फेयर २०२२–२३’ को उद्घाटन् समाजसेवी वरिष्ठ रोटरियन बेनिगोपाल मुदण्डाले रिवन काटेर उद्घाटन गरे । रोटरी ट्रेड फेयरमा महिलाहरुलेनै उत्पादन गरेका खाद्यान्न, लत्ताकपडा, गरगहना, घर सजावटका सामाग्रीहरु र विभिन्न मिठा–मिठा परिकार भएका खानाकासहित ३२ वटा स्टलहरु राखिएका छन् ।

रोटरी ट्रेड फेयरमा घुम्न र अवलोकन गर्न आउनेहरुका लागि सांगीतिक कार्यक्रम (कन्सर्ट) समेत राखिएको छ । सो मेलाको पहिलो दिन भारतको सिलिगुडी, जोगवनीसहित सीमावर्ती भारतीय गाउँहरु, विराटनगर, धरान, इटहरीसहित विभिन्न स्थानबाट आएका हजारौँले अवलोकनका गरिरहेको क्लबकी सचिव नमिता टिवडेवालले जानकारी दिइन् ।

रोटरी क्लब अफ विराटनगरले सो मेलाबाट आउने आम्दानीलाई सामाजिक कार्यमा खर्च गर्ने गरेको छ । उक्त आम्दानीलाई महिला शसक्तिकरणका लागि उपयोग गरिने क्लबकी पब्लिक इमेज कमिटी चेयर सपना सिंघलले बताइन् ।