विराटनगर, २९ असार ।प्रदेश १ सरकारका आन्तरिक मामिला तथा कानुनमन्त्री केदार कार्कीले दिएको अभिव्यक्ति प्रति नेपाल पत्रकार महासंघ मोरङले आपत्ति जनाएको छ । बुधबार पत्रकार महासंघ मोरङ शाखाका सचिव नेत्रपी अधिकारीले विज्ञप्ती निकाल्दै मन्त्री कार्कीले दिएको अभिव्यक्ति आपत्ति जनाएका हुन् ।

केही दिन अघि विराटनगरको स्थानीय एक अनलाइनलाई अन्तरवार्ता दिने क्रममा मन्त्री कार्कीले अश्लिल शब्द बोल्दै आपत्तिजनक अभिव्यक्ति दिएका थिए । निर्वाचन क्षेत्रमा पर्ने विराटनगर–१२ स्थित एकीकृत सुकुम्बासी बस्तीमा मन्त्री कार्कीले आर्थिक बर्षको अन्त्य हुन लागेको मौकामा रकमान्तर गरेर ७० लाख रुपैयाँ पठाउन खोजेका थिए ।

उक्त बस्ती निर्माणका लागि महानगरपालिकाले ४० लाख रुपैयाँ खर्च गरिरहेको र उक्त रकम पूर्ण रुपमा खर्च नभएको अवस्थामा आर्थिक बर्षको अन्त्यमा थप ७० लाख रुपैयाँ निकासा गरेपछि मन्त्री कार्की र महानगरपालिकाबीच रकम खर्च गर्ने बिषयमा विवाद भएको थियो ।

महानगरपालिकाले भने प्रदेश सरकारबाट आर्थिक बर्षको अन्त्यमा ७० लाख रुपैयाँ निकासा भएर आउन लागेपनि छोटो अवधिमा उक्त रकम खर्च गर्न नसकिने मनसाय व्यक्त गरेको थियो ।

मन्त्री कार्कीलाई भने रकम खर्च गर्न दबाब दिएको आरोप लागेको थियो । महानगरपालिका नेतृत्वसँग रकम खर्च गर्ने बिषयमा भएको विवादबारे विभिन्न संचारमाध्याममा समाचार आएपछि मन्त्री कार्की आक्रोशित बनेका थिए ।

उनले महानगरपालिकालाई रकम खर्च गर्न दबाब दिएको बिषयमा समाचार प्रकाशन गर्ने पत्रकारहरुलाई लक्षित गर्दै आफूलाई आरोप लगाए जस्तै पत्रकारलाई पनि बलात्कारको आरोप लगाउन सकिने भन्दै आपत्तिजनक अभिव्यक्ति दिएका हुन् ।

उनको सो अभिव्यक्तिको यतिबेला चौतर्फी आलोचना भइरहेको छ । सोही अभिव्यक्तिका कारण उनी अहिले विवादित भएका छन् । पत्रकार महासंघ मोरङले समाचारमा आएका विषयहरुप्रती असहमति राख्ने, खण्डन गर्ने, उजुरी गर्ने कानुनी बाटो हुँदाहुँदै समाचार लेख्ने पत्रकारलाई बलात्कारी बनाउनेसम्मको धम्की दिनुले विधिको शाशनको उपहास भएको जनाएको छ ।

महासंघले यस प्रकारका अभिव्यक्तिबाट विचलित नभई कार्यक्षेत्रमा सकृय रहन पत्रकारहरुलाई आग्रहसमेत गरेको छ । यसैबिच पत्रकार सम्बद्ध विभिन्न संग संगठनले पनि मन्त्री कार्कीको अभिव्यक्तिप्रती आपत्ति जनाएका छन् । प्रेस चौतारी र प्रेस युनियनलगायत पत्रकार सम्बद्ध विभिन्न संगठनहरुले विज्ञप्ती प्रकाशित गर्दै मन्त्री कार्कीको अभिव्यक्तिप्रती आपत्ति जनाएका हुन् ।