विराटनगर, १० असार । विराटनगर महानगरपालिका नगर सभाको १० औँ अधिवेशनमा आगामी आर्थिक वर्षका लागि आय र व्ययको बजेट सार्वजनिक भएको छ ।

आगामी आर्थिक वर्षमा कुल रु.तीन अर्ब ६२ करोड ५५ लाख ६७ व्यय हुने अनुमान गरिएको छ । सो व्यय मध्ये कार्यालय सञ्चालन तथा प्रशासनिक क्षेत्रतर्फ रु.५५ करोड ३५ लाख ५० हजार, पूर्वाधार विकास क्षेत्रतर्फ रु.एक अर्ब ८९ करोड ७१ लाख १७ हजार, आर्थिक विकास क्षेत्रतर्फ रु.२७ करोड ७३ लाख, सामाजिक विकास तर्फ रु.७८ करोड ३९ लाख, सुशासन तथा अन्तर सम्बन्धित क्षेत्रतर्फ रु.सात करोड ७७ लाख र वातावरण तथा विपद् व्यवस्थापन क्षेत्रतर्फ रु.तीन करोड ६० लाख खर्च हुने बजेटमा अनुमान गरिएको छ ।

विराटनगर महानगरपालिकाका उपप्रमुख शिल्पा निराला कार्कीले वाचन गर्नु भएको बजेटमा आगामी वर्ष सञ्चालन हुने मुख्य आयोजनाहरुमा वडास्तरीय आयोजनामा रु.४१ करोड ६८ लाख १७ हजार, नगरस्तरीय आयोजनाका लागि रु.३० करोड, बहुवर्षीय तथा गौरवका आयोजनाका लागि रु.२९ करोड, क्रमागत योजनाको भुक्त्तानीका लागि रु.४० करोड, आरयुडिपीबाट निर्माण भएका लगायतका पिच सडकहरु समेत गरी मर्मतसम्भारमा रु.१४ करेड, अन्यपूर्वाधारतर्फ रु नौ करोड ८० लाख, फोहोर पानी प्रशोधन केन्द्रका लागि रु.दूई करोड ५० लाख र समपुरक कोषमा रु.चार करोड ८० लाख विनियोजन भएको छ ।

आगामी आर्थिक वर्षको अनुमान गरिएको खर्च व्यहोर्ने स्रोतमध्ये सङ्घीय सरकार अन्तर सरकारी वित्तीय हस्तान्तरण तर्फ रु.एक अर्ब २१ करोड ८५ लाख र प्रदेश सरकारतर्फ रु.चार करोड ९१ लाख ९७ हजार, राजस्व बाँडफाँड रु.एक अर्ब १३ करोड ९९ लाख ७० हजार, आन्तरिक आय रु.एक अर्ब, जनसहभागिता रु.आठ करोड, अन्य अनुदान तथा क्रृण रु.१० करोड १९ लाख अन्यसंघसंस्था रु.तीन करोड ६० लाख हुने बजेटमा अनुमान गरिएको छ ।

नीति कार्यक्रम तथा बजेटको कार्यान्वयनबाट विराटनर महानगरको आर्थिक तथा सामाजिक क्षेत्रमा उल्लेखनीय नतिजा हासिल हुने बजेटमा विश्वास व्यक्त्त गरिएको छ ।

मध्यकालीन खर्च संरचना
त्रीवर्षीय मध्यकालीन खर्च संरचना अनुरुप आर्थिक वर्ष २०८०÷८१ का लागि रु.तीन अर्ब ९८ करोड ८१ लाख २३ हजार र आर्थिक वर्ष २०८१÷८२ को लागि रु.चार अर्ब ३८ करोड ६९ लाख ३६ हजार आय तथा व्ययको अनुमान उपप्रमुख कार्कीले बजेटमा वाचन गर्नुभएको छ ।