विराटनगर, २१ जेठ । विराटनगर महानगर कार्यपालिकाको शनिबार भएको निर्वाचनमा सत्ता गठबन्धन पराजित भएको छ । सत्ता गठबन्धनसँग निर्वाचत जित्ने गणित भएपनि पराजित भएको हो ।

कार्यपालिका निर्वाचनमा सत्तारुढ दल नेपाली कांग्रेस र जसपाले गठबन्धन गरेका थिए । कार्यपालिका निर्वाचनमा ९७ मतदाता थिए । जसमध्ये कांग्रेस र जसपा गठबन्धनको ५० मत थियो । तर, निर्वाचनमा ४३ मत रहेको एमाले विजयी भएको हो । एमालेले स्वतन्त्रबाट चुनाव जितेका जनप्रतिनिधिसँग तालमेल गरेको थियो ।

शनिबार भएको भएको निर्वाचनमा अल्पसंख्यकतर्फ एमालेका दिपककुमार कर्ण ५२, स्वतन्त्र ओमप्रकाशकुमार साह ५५ र स्वतन्त्र सन्जिब साह ५२ मत ल्याएर विजयी भएका छ्न् ।

अल्पसंख्यकमा काँग्रेस उम्मेदवार प्रेम राठी ४०, जसपाका ववितादेवी साह ४५ र जसपाकै विमलादेवी पोद्धार ४१ मत प्राप्त गपर पराजित भएका छन् ।

महिलातर्फ एमालेका सवै उम्मेद्वार विजयी भएका छन् । एमालेका सन्तलीदेवी विश्वास ५५ कमला श्रेष्ठ, ५५, ताराकुमारी राय ५३ सरिता घिमिरे नेपाल ५३ र खुश्बु विश्वकर्मा ५२ मत ल्याएर विजयी भएका छन् । काँग्रेसकी अन्जु दाहाल गौतमले ४० मत, गायत्री थापाले ३९, रुपा देउजाले ४०, विनितासिंह ठकुरीले ४० र जसपाकी चुलियादेवि साहले ४० मत मात्रै पाएका थिए ।

३० बैशाखमा सम्पन्न निर्वाचनमा एमालेबाट उपमेयरसहित ४३ जना जनप्रतिनिधि निर्वाचित भएका थिए । काँग्रेसले मेयरसहित ४० जनप्रतिनिधि जितेको थियो । जसपाले १०, स्वतन्त्र ३ र राप्रपाको १ जना निर्वाचित भएका थिए ।

सत्ता गठबन्धन पराजित भएसँगै महानगर कार्यपालिकामा एमालेको एकल बहुमत पुगेको छ । २९ सदस्यीय महानगर कार्यपालिकामा एमालेका उपमेयर, ९ वडाध्यक्षसहति १५ जना भएका छन् । कार्यपालिकामा काँग्रेसका मेयरसहित ६ वडाध्यक्ष, स्वतन्त्रको १ वडाध्ययक्षसहित तीन, जसपाको २ वडाध्यक्ष र राप्रपाको १ वडाध्यक्ष कार्यपालिकामा प्रतिनिधित्व भएको छ ।