काठमाडौं, ३ फागुन । नेपाली कांग्रेसका १० भ्रातृ संस्थाका केन्द्रीय कार्यसमिति भंग भएको छ । मंगलबार सानेपामा बसेको केन्द्रीय कार्यसम्पादन समितिको बैठकले यस्तो निर्णय गरेको हो ।

बैठकले  म्याद सकिएका भ्रातृ संस्थाको केन्द्रीय समिति भंग गरेर ३० फागुनभित्र तदर्थ समिति बनाउने जिम्मेवारी सभापति शेरबहादुर देउवालाई दिएको प्रवक्ता प्रकाशशरण महतले बताए ।

केन्द्रीय कार्यसम्पादन समितिले नेपाल विद्यार्थी संघ, नेपाल तरुण दल, नेपाल प्रजातन्त्र सेनानी संघ, नेपाल किसान संघ, नेपाल आदिवासी जनजाति संघ, नेपाल लोकतान्त्रिक अपांग संघ, नेपाल तामाङ संघ, नेपाल ठाकुर समाज, नेपाल महिला संघ, र नेपाल भूतपूर्व सैनिक संघका केन्द्रीय समितिहरू भंग गर्ने निर्णय गरेको हो ।

बैठकले नेपाल दलित संघको केन्द्रीय महाधिवेशन गर्न निर्देशन दिएको छ  । दलित संघको सबै जिल्लामा अधिवेशन सम्पन्न भएकाले आगामी चैत्र ७, ८, ९ र १० गते अधिवेशन गर्न निर्देशन गरिएको बताए । यस्तै बैठकले भ्रातृ तथा शुभेच्छुक संस्थामा रिक्त पदाधिकारीहरूको हकमा पदपूर्तीको जिम्मा पनि सभापतिलाई दिएको छ ।