विराटनगर, २ फागुन । प्रदेश १ को नाम विराट प्रदेश राख्न राजवंशी समुदायले माग गरेका छन् । सोमबार विराटनगरमा पत्रकार सम्मेलन गर्दै राजवंशी समाज उत्थान समिति (विराट) ले प्रदेशको नाम विराट राख्न माग गरेको हो ।

राजवंशी समाज उत्थान समितिले विराट राजवंशीहरु पूर्वी नेपालको आदिवासी भएकाले सामूहिक पहिचानका लागि प्रदेशको नाम विराट हुनुपर्ने माग गरेको हो ।

समितिले प्रदेशको नाम विराट नराखिए कडा आन्दोन गर्ने चेतावनी समेत दिएको छ । प्रदेश स्थापना भएको करिब ४ वर्ष पुग्न लागेपनि नामाकरण हुन सकेको छैन ।

प्रदेश १ मा राजधानीको टुंगो लागेपनि प्रदेश सरकारले नामाकरणको प्रस्ताव ल्याउन सकेको छैन । पछिल्लो समय प्रदेश नामारणको चर्चा चलेसँगै विभिन्न जातीय संगठनहरुले पहिचानका आधारमा नामाकण गर्न माग गर्दै आएका छन् । समितिले आगामी ६ फागुनमा हुने १५ औं बृहत भेलाको तयारीबारे जानकारी दिने उदेश्यले आयोजना गरेको पत्रकार सम्मेलनमा विराट राजवंशीलाई आदिवासी जनजाति उत्थान राष्ट्रिय प्रतिष्ठानमा सूचिकृत गर्नुपर्ने माग गमेत गरेको छ ।

समितिका केन्द्रीय अध्यक्ष भुवनेश्र मण्डलले विराट राजवंशीलाई आदिवासी जनजाति उत्थान राष्ट्रिय प्रतिष्ठानमा सूचिकृत गर्न माग गरे ।
समितिले विराट राजवंशीलाई राज्यको हरेक अङ्गमा स्थान सुरक्षित गर्नु पर्ने, सो समुदायलाई विराटनगरको प्रथम जातीको रुपमा घोषणा गर्नुपर्ने, प्रदेश सभा सदस्यमा यस जातीलाई समानुपातिक रुपमा प्रतिनिधित्व सुनिश्चित गर्नुपर्ने, विराटनगर महानगरपालिका, कटहरी, जहदा बुढीगंगा , धनपालथान र ग्रामथान गाउँपालिका क्षेत्रलाई विराट राजवंशी स्वायत्त परिषदको व्यवस्था गर्नुपर्ने माग समेत गरेको छ ।

यस्तै समुदायको उत्थानका लागि प्रत्येक तह र अङ्गहरुमा छुट्टै आरक्षणको व्यवस्था गनुपर्ने, विराटनगरको भेडियारीस्थित विराट दरवार क्षेत्रको संरक्षण र प्रवद्र्धनका लागि विराट राजवंशी समुदायको नेतृत्वमा पर्यटकीय क्षेत्रको रुपमा विकास गर्नुपर्ने लगायतका माग संघीय र प्रदेश सरकारले यथाशिघ्र कार्यान्वयन गर्नुपर्ने समितिको माग छ ।

आगामी ६ फागुनमा मोरङको जहदा गाउँपालिका–३ वभनटोलीमा हुने भेलामा मोरङ, सुनसरी र झापाका विराट राजवंशीको वृहत सहभागिता हुने पत्रकार सम्मेलनमा जनाइएको छ । २०६८ सालको जनगणना अनुसार मोरङ, सुनसरी र झापामा सो समुदायको जनसङ्ख्या ४० हजार रहेको अध्यक्ष मण्डलले जानकारी दिए ।