विराटनगर, ९ माघ । मोरङको रतुवामाई नगरपालिकाबाट प्रतिवन्धित लागुऔषध गाँजासहित एक जनालाई प्रहरीले पक्राउ गरेको छ । रतुवामाई नगरपालिका—८ स्थित कुखुरे डाँडाबाट स्थानीय ४५ वर्षीय कृष्ण राईलाई ४ केजी ३९० ग्राम गाँजासहित प्रहरीले पक्राउ गरेको हो ।

आइतबार दिउँसो १२ बजेतिर इलाका प्रहरी कार्यालय सिजुवाबाट खटिएका प्रहरी जवान अण प्रसाद कोइरालाले राईलाई घरबाटै पक्राउ गरेका हुन् । प्रहरी जवान कोइरालाले गोप्य सूचनाका आधारमा खान तलासी गर्दा घरमै उक्त परिमाणको गाँजासहित राईलाई पक्राउ गरेका थिए ।

पक्राउ परेका राईको विषयमा थप अनुसन्धान भइरहेको र आइतबार म्याद थपका लागि जिल्ला अदालत लगिने प्रहरीले जनाएको छ । प्रहरी जवान कोइरालाको सकृयताका कारण पछिल्लो समय सो क्षेत्रबाट लागुऔषध ओसारपसार र कारोबारमा संलग्ग व्यक्तिहरु धमाधम पक्राउ पर्दै आएका छन् ।

केही दिन अघि पनि प्रहरी जवान कोइरालाले रतुवामाईबाटै ठुलो परिमाणको लागुऔषधसहित एक जनालाई पक्राउ गरेका थिए ।