विराटनगर, २ माघ । बालिकालाई बलात्कार गरेको आरोपमा नेपाली कांग्रेसका नेता पक्राउ परेका छन् । नेपाली कांग्रेस प्रदेश १ समितिका सदस्य रहेका मोरङको बुढीगंगा गाउँपालिका–२ का ५० वर्षीय शिव कोइरालालाई प्रहरीले १० वर्षीया बालिकालाई बलात्कार गरेको आरोपमा आइतबार पक्राउ गरेको हो ।

बुढीगंगा गाउँपालिका–२ स्थित टंकिसनवारी घर भएका कोइरालालाई बालिकालाई जवरजस्ती करणी गरेको आरोपमा पक्राउ गरिएको जिल्ला प्रहरी कार्यालय मोरङका प्रहरी नायव उपरिक्षक मञ्जिल मुकारुङले जानकारी दिए ।

उनले पीडीतको जाहेरीका आधारमा कोइरालालाई नियन्त्रणमा लिएर अनुसन्धान प्रकृया अघि बढाइएको बताए । प्रहरी नियन्त्रणमा रहेका कोइरालालाई सोमबार जिल्ला अदालत मोरङमा म्याद थपको तयारी गरिएको छ ।

काइरालाले १० वर्षीय बालिकालाई टंकिसनवारीस्थित बाथरुममा शुक्रबार जवरजस्ती करणी गरेको आरोप छ । कोइराला केही साता अघि विराटनगरमा सम्पन्न अधिवेशनबाट प्रदेश समिति सदस्यमा निर्वाचित भएका थिए ।