विराटनगर, १ पुस । नेकपा (एमाले) मोरङको नवौं जिल्ला अधिवेशन आगामी पुष २३ र २४ गते विराटनगरमा हुने भएको छ । बिहिबार बसेको नेकपा (एमाले) मोरङको बैठकले केन्द्रीय सर्कुलर अनुसारनै आगमी पुष २३ र २४ गते विराटनगरमा जिल्ला अधिवेशन गर्ने निर्णय गरेको हो ।

अधिवेशन सम्पन्न गर्नका लागि विभिन्न समिति बनाई जिम्मेवारी समेत बाँडफाँड गरिएको नेकपा (एमाले) मोरङका अध्यक्ष ऋषिकेश पोखरेलले बताउनुभयो ।

अध्यक्ष पोखरेलको अध्यक्षतामा बसेको जिल्ला कमिटी बैठकले अधिवेशनका लागि विभिन्न जिम्मेवारी बाँडफाँडसमेत गरेको छ । मोरङको कम्यूनिष्ट आन्दोलनको इतिहाससहितको राजनितिक प्रतिवेदन बनाउन यज्ञ शर्मा, ताराबहाहदुर काफ्ले, अर्जुन अधिकारी, रुपेश खतिवडा, महेन्द्र बिष्ट, एकराज भट्टराई, गणेश दाहाल, इरान राई र नरेन्द्र बराल रहेको समिति बनाइएको छ ।

यस्तै लेखा परिक्षकको नियुक्ति गर्दै केन्द्रीय सदस्य तथा तात्कालिन एमाले मोरङका उपाध्यक्ष रामलाल साह र नरेन्द्र बराललाई लेखा परिक्षण तयार गर्ने जिम्मेवारी दिइएको छ ।

त्यस्तै प्रतिनिधि व्यवस्थापन समितिमा महेश भट्टराई, प्रचार समितिमा रुपेश खतिवडा, खाद्यान्न र आवास व्यवस्थापनमा बाबुराम कार्की, मञ्च, हल र स्वयंसेवक व्यस्थापनमा पर्शुराम बस्नेत, अतिथि सत्कार समितिमा धर्मानन्द सञ्जेलाई संयोजकको जिम्मेवारी तोकिएको छ ।

यस्तै बैठकले आगामी पुष १० गतेभित्र पार्टी सदस्यहरुको व्यस्थापन गरिसक्ने तथा १७ वटै पालिकाको बैठक पुष ५ गते सम्पन्न गर्ने निर्णय गरेको छ । यस्तै सवै वडा शाखाको बैठक पुष ७ गते सम्पन्न गर्ने र पुष ९ गते अधिवेशनको प्रचार स्वरुप हरेक वडाका मुख्य ५ वटा चोकमा झण्डा फहराउने निर्णय समेत भएको छ ।

यसैगरि पुष ११ गते सवै वडास्तरीय पार्टी सदस्यको भेला गर्ने र पुष १७ गते सवै वडा तथा शाखामा प्रतिनिधि छनौट गर्ने निर्णय गरेको छ । ३५ हजार संगठित सदस्य रहेको मोरङमा एमालेले प्रत्येक ५० जना संगठित सदस्य बराबर एक जना प्रतिनिधि छनौट गर्ने निर्णय गरेको छ ।

प्रतिनिधि छनौट गर्दा ३३ प्रतिशत महिला सहित दलित, अल्पसंख्यक, अपाङ्गतासहितको पूर्ण समावेशी अनिवार्य हुनुपर्ने छ भने मजदुर÷पेशागत क्षेत्र र जनसंगठनहरु सवैमा ५÷५ जनाका दरले प्रतिनिधि चयन गर्नुपर्ने व्यवस्था गरिएको छ । अधिवेशन सम्पन्न गर्न आवश्यक आर्थिक संकलन भने पार्टी भित्रैबाट गर्ने निर्णय भएको अध्यक्ष पोखरेलले बताउनुभयो ।

यसका लागि आयोजक तथा प्रतिनिधिबाट प्रतिव्यक्ति एक हजार तथा हरेक संगठित सदस्यबाट ५० रुपैयाँ सहयोग संकलन गर्ने एमाले मोरङले निर्णय गरेको छ ।

यसैगरि जिल्ला कमिटी बैठकले मोरङ जिल्ला कमिटीमा रहेर केन्द्रीय कमिटीको जिम्मेवारीमा पुग्ने नेताहरुलाई विदाई गरेको छ । मोरङको उपाध्यक्ष रहनुभएका रामलाल साह केन्द्रीय सदस्य, धना तामाङ प्रदेश समिति उपसचिव, यस्तै केन्द्रिय अनुशासन आयोगमा चयन हुने लक्ष्मी भण्डारी र राजमति इङ्नामलाई बधाईसहित विदाई गरेको हो ।

यस्तै पार्टीको स्थायी समिति सदस्य तथा प्रदेश समितिमा चयन हुने नेताहरुलाई समेत अभिनन्दन गरिएको छ । सोहि बैठकले मोरङ जिल्ला कमिटीको उपाध्यक्षमा बाबुराम कार्की र सचिवमा रुपेश खतिवडालाई चयन गर्दै १६५ सदस्सीय नवौ जिल्ला अधिवेशन आयोजक कमिटी निर्माण गरेको अध्यक्ष पोखरेलले बताउनुभयो ।

बैठकमा नेकपा एमालेका स्थायी कमिटी सदस्यहरु देवराज घिमिरे, गुरु बराल, लालबाबु पण्डित, भानुभक्त ढकाल, डा. शिवमाया तुम्बाहाम्फे, हिक्मत कार्की, केन्द्रीय सदस्यहरु विनोद ढकाल, जीवन घिमिरे, रामलाल साह, नैनकला ओझा र तारा राईलगायतका नेताहरुको सहभागिता रहेको थियो ।

यसैबिच आजको बैठकलाई केहि जिल्ला कमिटि सदस्यहरुले बहिस्कार गरेको विषयमा भने अध्यक्ष ऋषिकेश पोखरेलले आफूलाई जानकारी नभएको र त्यस्तो कुनै गुनासो रहेको पाइए सम्बोधन गर्ने समेत बताउनुभएको छ ।