विराटनगर, १८ मंसिर । नेपाली कांग्रेस प्रदेश १ को नेतृत्व चयनका लागि मतदान सम्पन्न भएको छ । बिहान ८ बजेदेखि सुरु हुने भनिए पनि झण्डै ७ घण्टा ढिलोगरी मतदान सुरु भएको थियो ।

मतपत्रमा इलामबाट सदस्यमा उठेका श्याम खड्की, शान्तिकला तामाङ राई र जीवन नेपालीको नाम छुटेर विवाद भएपछि मतदान रोकिएको थियो ।

छुटेका उम्मेदवारको नाम राखिएपछि सुरु भएको मतदान साढे ७ बजे सम्पन्न भएको हो । कुल १८०४ मतदातामध्ये १७२२ मत खसेको निर्वाचन समितिका अधिकृत भरत थापाले जानकारी दिए ।

थापाका अनुसार मत गणना आइतबार बिहानदेखि सुरु हुनेछ । विराटनगरस्थित नेपाली कांग्रेस मोरङको पार्टी कार्यालयमा बिहान ८ बजेपछि मत गणना सुरु हुने निर्वाचन समितिका अधिकृत थापाले जानकारी दिए ।

प्रदेश अधिवेशनले एक सभापति, दुई उपसभापति, दुई महामन्त्री र ४ सहमहामन्त्री निर्वाचित गर्नेछ । सहमहामन्त्रीमा २ महिला र २ खुल्ला निर्वाचित हुनेछन् ।

नेपाली कांग्रेस प्रदेश १ को नेतृत्वका लागि प्यानलसहित उम्मेदवारी दर्ता भएको थियो । सभापतिमा पार्टी संस्थापन पक्ष (देउवा‒सिटौला समूह) बाट झापाका उद्धव थापा र कोइराला–पौडेल समूहबाट केन्द्रीय सदस्य गुरुराज घिमिरेले प्यानलसहित उम्मेदवारी दिएका छन् ।