विराटनगर, २२ कात्तिक । मोरङको दुई पालिकाले आफ्ना नागरिकको उपचारमा लाग्ने रगत निशुल्क उपलब्ध गराउने पहल गरेका छन् । रतुवामाई र विराटनगर महानगरपालिकाले आफ्नो पालिकाका नागरिकलाई निशुल्क उपलब्ध गराउन पहल गरेका हुन् ।

ती पालिकाले रेडक्रससँगको समन्वयमा आफ्ना नागरिकको उपचारका लागि चढाउदा लाग्ने रगत निशुल्क उपलब्ध गराउने व्यवस्था गरेका हुन् । नेपाल रेडक्रस सोसाइटी मोरङसँग ती पालिकाले सम्झौता गरि आफ्ना क्षेत्रका विरामी स्थानीय अस्पतालमा भर्ना भई उपचार गराउदा रगतको शुल्कमा छुटको व्यवस्था गराएका हुन् ।

रेडक्रस रक्त सञ्चार सेवा मोरङले प्रति पिन्ट रगतको लागि लाग्ने थैला तथा परिक्षण र सेवा शुल्क गरि ८ सय १० रुपैयाँ शुल्क लिँदै आएको छ । रेडक्रसले सो क्षेत्रका विरामीलाई परिचयको आधारमा निशुल्क गरिने र पछि सो रकम सम्बन्धीत पालिकाले भूक्तानी गर्ने जनाइएको छ ।

विराटनगरका मेयर भीम पराजुली र रतुवामाईका मेयर रविन राईले विरामीको जिवन बचाउन उपचारमा लाग्ने रगत निशुल्क गराउन अग्रसरता देखाएका छन् । सो अग्रसरतासँगै नगरवासी हर्षित भएका छन् ।

अस्पतालबाट रगत माग गरेको पूर्जाको प्रतिलिपि र विरामी विराटनगर वा रतुवामाईको प्रमाण ल्याएको अवस्थामा आगामी २०७९ सालसम्म रगत निशुल्क उपलब्ध गराइने रेडक्रसले जनाएको छ ।

रेडक्रस क्षेत्रीय रक्त सञ्चार सेवा केन्द्र र सो अन्तर्गतका रक्त सञ्चार नोबेल मेडिकल कलेज, विराट मेडिकल कलेज, रंगेली र उर्लाबारीको रक्त सञ्चार सेवा कार्यालयबाट समेत ती पालिकाका जनतालाई निशुल्क रगत उपलब्ध गराइने छ ।