विराटनगर, १६ असोज । लामो समयदेखि पोलभाडा नतिरेको भन्दै नेपाल विद्युत प्राधिकरणले विराटनगरमा पनि केवल तथा इन्टरनेटको तार काट्न थालेको छ । यससँगै विराटनगरका विभिन्न स्थानमा इन्टरनेट र केवल सेवा अवरुद्ध भएको छ ।

२०७३ साल यता बिजुली पोलको भाडा नतिर्ने इन्टरनेट र केवल टेलिभिजन सेवा पदायकले जडान गरेको तार प्राधिकरणले काट्न थालेको हो ।

शनिबार प्राधिकरणले विराटनगरको पुष्पलाल चोक, बुढीगंगा र ग्रामथान गाउँपालिकाबाट तार काट्न सुरु गरेको नेपाल विद्युत प्राधिकरण विराटनगर वितरण केन्द्रका प्रमुख रोशन खड्काले जानकारी दिए ।

उनले शनिबार पोल भाडा नतिर्ने तीन स्थानमा सुविसु, वल्र्डलिंक, क्लासिटेक, भायानेटलगायत आधा दर्जन कम्पनीको तार काटिएको बताए ।

उनले २०७३ सालदेखि सेवा प्रदायक कम्पनीहरुले पोल भाडा नतिरेको र सरकारले तिर्न अल्टिमेट दिँदा पनि अटेर गरेपछि तार काट्न थालिएको बताए ।

तार काटिएसँगै तार काटिएका क्षेत्रमा अहिले इन्टर र केवल टेलिभिजन अवरुद्ध भएको छ ।