काठमाडौं, २५ साउन । आज एकै दिन धितोपत्रको दोस्रो बजारमा लगानीकर्ताले १४ अर्ब रुपैयाँबराबरको शेयर किनबेच गरेका छन् । सोमबार नेप्से झिनो अंकले बढे पनि शेयर किनबेच भने १४ अर्ब १३ करोड ७३ लाख ३८ हजार ८ सय ८१ रुपैयाँको हुन पुगेको हो । जसमा २ सय २४ कम्पनीको २ करोड ५३ लाख ९३ हजार ६ सय ९९ कित्ता शेयर खरिदबिक्री भयो ।

कारोबार खुलेसँगै ओरालो लागेको नेप्से सूचक दिनभर अस्थिर बन्न पुग्यो । १२ बजार ३३ मिनेटमा दिनभर न्युनतम विन्दु ३०९८ अंकमा नेप्से पुग्यो भने अधिकतम ३१२१ विन्दुसम्म पुुग्यो । नेप्से सूचक राताम्मे बने पनि अन्तिम समयमा भने १ दशमलव ५४ अंकले बढेर हरियाली बन्न पुग्यो । नेप्से परिसूचक हरियो बने पनि ठूला कम्पनीहरूको कारोबार मापन गर्ने सेन्सेटिभ परिसूचक भने २ दशमलव ०५ अंकले घटेर राताम्मे बन्यो।

जसले गर्दा वाणिज्य बैंक, व्यापार, होटल एण्ड टुरिज्म, विकास बैंक, उत्पादन तथा प्रशोधन, माइक्रोफाइनान्स, म्युचुअल फण्ड तथा लगानी समूहका सूचक राताम्मे बने । तर जलविद्युत् र फाइनान्स समूहको भने ३ दशमलव ३५ प्रतिशतले सूचक बढ्न पुग्यो, योसँगै निर्जीवन बीमा, अन्य र जीवन बीमा समूहका सूचक झिनो अंकले बढेर हरिया बने ।

जलविद्युत् समूह हरियो बनेसँगै आज सर्वाधिक कमाउनेहरूको सूचीमा जलविद्युत्‌क्षेत्रका कम्पनीहरू अगाडि छन् । जसमा हिमालय पावर पार्टनर, नेपाल हाइड्रो डेभलपर्स, युनियन हाइड्रोपावर र ङादी ग्रुप पावर कम्पनीको शेयरमूल्यमा सकारात्मक सर्किट लागेको छ ।

यसबाहेक फाइनान्सतर्फ आईसीएफसी फाइनान्स, विकास बैंकतर्फ कर्पोरेट विकास बैंक र माइक्रोफाइनान्सतर्फ जीवनविकास लघुवित्तको शेयरमूल्यमा सर्किट लाग्न पुग्यो । बाँकी कारोबारमा आएका ७३ कम्पनीको शेयरमूल्य बढ्यो भने १ सयवटा कम्पनीको शेयरमूल्य घट्न पुग्यो । जसमा आरम्भ चौतारी लघुवित्त, कृषि विकास बैंक, आशा लघुवित्त, बोटलर्स नेपाल, बैंक अफ काठमाण्डूलगायतका कम्पनी अगाडि छन् ।

बजार झिनो अंकले बढे पनि कारोबार भने उल्लेख्य रूपमा बढ्यो । आजको बजारमा लगानीकर्ताको उपस्थिति बाक्लै देखिन पुग्दा १४ अर्बभन्दा बढीको कारोबार हुन पुग्यो ।

आज शेयर खरिदविक्रीका क्रममा लगानीकर्ता अरुण हाइड्रोमा झुम्मिन पुगे । जसले गर्दा सो कम्पनीको एकै दिन ६७ करोड ४८ लाख रुपैयाँको शेयर किनबेच भयो ।

योसँगै आज माथिल्लो तामाकोसी, अपि पावर कम्पनी, सिनर्जी पावर विकास कम्पनी र युनाइटेढ मोदी हाइड्रोको सबैभन्दा धेरै कारोबार हुन पुग्यो ।