सुनसरीको धरानस्थित बीपी कोइराला स्वास्थ्य विज्ञान प्रतिष्ठानको बेथितिविरुद्ध आन्दोलनरत संयुक्त संघर्ष समितिले आफ्ना माग पूरा गर्न सातदिने अल्टिमेटम दिएको छ । संयुक्त संघर्ष समितिले २३ असारभित्र आफ्ना माग पूरा गर्न अल्टिमेटम दिएको हो ।

संघर्ष समितिले उक्त समयभित्र माग पूरा नभए प्रतिष्ठानका सम्पूर्ण फ्याकल्टी, कर्मचारी, आवासीय चिकित्सक र विद्यार्थीसहित सामूहिक राजीनामा दिएर प्रधानमन्त्री कार्यालय घेराउ गर्ने चेतावनी दिएको छ । समितिले अल्टिमेटम दिँदै प्रतिष्ठानका चारै जना पदाधिकारीको कार्यकक्षमा तालाबन्दी गरेको छ ।

बढ्दो बेथितिको अन्त्यको माग गर्दै १ असारदेखि प्रतिष्ठानमा कार्यरत चिकित्सक, कर्मचारी र विद्यार्थीले आन्दोलन गर्दै आएका छन् । मंगलबार पदाधिकारीसितको वार्तामा उपकुलपति प्राडा ज्ञानेन्द्र गिरीले मदिरा सेवन गरेर वार्तास्थलमा उपस्थित भएपछि वार्ता भाँडिएको थियो । बुधबारदेखि सातदिने अल्टिमेटमसहित पदाधिकारीको कार्यकक्षमा तालाबन्दी गरेर आन्दोलन अघि बढाएको संघर्ष समितिले जनाएको छ ।

प्रतिष्ठानको साख र प्रतिष्ठा पुनः स्थापित गर्दै शुद्धीकरणको अभिप्रायले विगत १६ दिनदेखि आन्दोलनरत रहेको संयुक्त सघर्ष समितिले कुलपति एवं प्रधानमन्त्रीलाई समेत जानकारी गराउँदा पनि यसको समाधान नभएकोले सोमबारदेखि आन्दोलनको स्वरूप परिवर्तन गरेर रिले अनशन सुरु गरेको थियो ।

आन्दोलनलाई सम्बोधन गर्नका लागि पदाधिकारीहरूको गैरजिम्मेवारीपन, लाचारीपन एवं शून्य तयारीले स्तब्ध तुल्याएको भन्दै समितिले विज्ञप्ति जारी गरेको छ । मंगलबार आन्दोलनका क्रममा बाहिरबाट भिजिलान्ते प्रवेश गरी अराजक गतिविधि गरेर संघर्ष समितिको आन्दोलनलाई तुहाउने प्रयास भएको भन्दै रिले अनशनलाई स्थगित गरी तालाबन्दी र सातदिने अल्टिमेटममा आन्दोलनको स्वरूप अघि बढाएको समितिका सदस्य डा. पदम नेपालीले बताए ।

पदाधिकारीको तालाबन्दीपछि अक्षम सम्पूर्ण पदाधिकारीहरूको राजीनामा एवं बहिर्गमन हुनुपर्ने, प्रधानमन्त्रीकै पहलमा उच्चस्तरीय वार्ता टोली गठन गरिनुपर्ने, अबका दिनमा पदाधिकारीहरू चयन गर्दा विभिन्न आयोग एवं विज्ञहरूले दिएको सुझावअनुसार विशिष्टीकृत एवं विज्ञहरूको समूह बनाइ उक्त समूहले सिफारिस गरेको व्यक्ति मात्र चयन हुने वातावरण बनाइनुपर्ने पनि माग गरिएको छ ।