विराटनगर, १४ असार । बेलबारी नगरपालिका वार्ड नं ९ कार्यालयले वाडभरिका विभिन्न सङ्घ संस्थालाई जग्गा दान गर्ने जग्गादाताहरूलाई सम्मान गरेको छ । वडा कार्यालयले आज एक कार्यक्रमको आयोजना गरेर उनीहरूलाई सम्मान गरेको हो ।

बेलबारी नगरपालिका वडा नं ९ का अध्यक्ष नगेन्द्र खड्काले दाताहरूले संस्थालाई लाएको गुण कहिल्यै भुल्न नसकिने बताउँदै अरूलाई पनि प्रेरणा मिलोस् भनेर यो कार्यक्रमको आयोजना गरिएको बताए ।

काली माविका प्रधानाध्यापक नारायण कोइरालाले दाताहरूले संस्थामा लगाएको योगदान अमूल्य रहेकोले विद्यालयले त्यसको सधैँ सम्मान गर्ने प्रतिबद्धता ब्यक्त गर्नुभयो ।

दाताहरूले भने संस्थालाई जग्गा दिन पाएकोमा आफूहरूलाई खुसी लागेको बताएका थिए । तर केही दाताहरूका परिवारका सदस्यले भने सम्झौता अनुसार काम नभएकोमा गुनासोसमेत प्रकट गरेका थिए ।

बेलबारी ९ मा रहेको काली माविलाई विभिन्न दाताहरूबाट ३ विगाहा १ कठ्ठा जग्गा प्राप्त भएको थियो भने ज्ञानोदय आधारभूत विद्यालयका लागि ३ कठ्ठा १, कृषि भवन निर्माणका लागि २ कठ्ठा १५ धुर र डाँगीहाट स्वास्थ्य चौकीका लागि २ कठ्ठा १५ धुर जग्गा प्राप्त भएको वाडाकार्यालयले जनाएको छ ।