विराटनगर, १२ असार । विराट व्यापार संघले विविध कार्यक्रम गरि २१ औँ स्थापना दिवस मनाएको छ । शनिबार विराटनगरमा रक्तदान, विपन्न परिवारलाई खाद्यान्न वितरण र द्विप प्रज्वलन गर्दै स्थापना दिवस मनाएको हो ।

विराटनगरका अस्पतालहरुमा भइरहेको रगत अभावलाई मध्यनजर गर्दै विराट व्यापार संघले दिवसको अवसरमा शनिबार विहान आयोजना गरेको रक्तदान कार्यक्रममा ४० पिन्ट रगत संकलन भएको छ ।

रक्तदान कार्यक्रममा सहभागि भएर विराट व्यापार संघका पदाधिकारी तथा सदस्यहरु, संघमा आवद्ध उद्योगी, व्यवसायी, कामदार, कर्मचारी, शसस्त्र प्रहरीलगायतले रक्तदान गरेका थिए ।

सोही कार्यक्रममा संघले कोरोना माहामारीका कारण हातमुख जोर्न समस्यामा पर्दै आएका अति विपन्न परिवारलाई रहतस्वरुप खाद्यान्न समेत वितरण गरेको छ ।

सामाजिक काममा अग्रसर तथा कोरोना माहामारीका कारण जारी गरिएको निषेधाज्ञाका कारण हातमुख जोर्न समस्यामा परेका अति विपन्न परिवारलाई राहत वितरणमा गरेर सहयोग गर्दै आएको संस्था अपन विराटगढ परोपकार समाज र सन्वीदी नेपाल मार्फत करिब एक सय परिवारलाई पुग्ने चालम, दाल, तेल, नुन, भुजालगायतका खाद्य सामाग्री वितरण गरेको विराट व्यापार संघका अध्यक्ष सुजन थापाले जानकारी दिए ।

त्यस्तै स्थापना दिवसकै अवसर पारेर विराट व्यापार संघले साँझ द्विप प्रज्वलनसमेत गरेको छ । प्रदेश १ का आन्तरिक मामिला तथा कानुन मन्त्री हिक्मतकुमार कार्कीको प्रमुख आतिथ्यतामा साढे ६ बजे दिवसको अवसरमा विराटनगरस्थित पञ्चमुखि मन्दिरमा पुजापाठ गर्दै मन्दिर अगाडी द्विप प्रज्वलन गरेको हो ।

संघले कोरोना संक्रमणका कारण ज्यान गुमाएका उद्योगी व्यवसायीको सम्झनामासमेत द्विप प्रज्वलन गरेको हो । विराट व्यापार संघ २०५७ सालमा विराटनगरका उद्योगी व्यवसायीहरुको सकृयतामा स्थापना भएको थियो । हाल विराट व्यापार संघमा करिब २ हजार उद्योगी/व्यवसायी आवद्ध रहेको अध्यक्ष थापाले जानकारी दिए।