विराटनगर, ६ जेठ । मोरङको पथरीशनिश्चरेमा दुर्घटना हुँदा २ जनाको मृत्यु भएको छ भने तीनजना घाइते भएका छन् । बिरामी आफन्तलाई हेर्न आउने क्रममा पाँच जना सवार रहेको मे १ च १८५१ नम्बरको स्कारपिओ गाडी पूर्व–पश्चिम लोकमार्गअन्तर्गत मोरङको पथरीशनिश्चरे नगरपालिका–२ जय चोकमा राति १२ बजेतिर दुर्घटनामा परेको थियो । सो दुर्घटनामा झापाको झापा गाउँपालिका–५ का ५३ वर्षीय लक्ष्मीप्रसाद पौडेल र मोरङको रङ्गेली नगरपालिका–३ रञ्जनीकी ७६ वर्षीया विष्णुमाया शिवकोटीको घटनास्थलमै मृत्यु भएको प्रहरीले जनाएको छ ।

प्रदेश १ ट्राफिक प्रहरी प्रमुख एसपी सञ्जीव शर्माका अनुसार दुर्घटनामा परेर स्कोरपिओ चालक बिर्तामोडका विकास उप्रेती, झापा गाउँपालिकाकी विनिता पौडेल र हल्दिबारीका रोशन उप्रेती घाइते भएका छन् । घाइतेहरूको विराटनगरको गोल्डेन अस्पतालमा उपचार भइरहेको छ ।