विराटनगर, फागुन ८–प्रदेश १ मा मानवअधिकार उल्लंघन तथा ज्यादतीका घटना बढेको पाइएको छ । सन् २०१९ मा मात्र प्रदेश १ मा मानवअधिकार उल्लंघन र ज्यादतीका घटनामा ८ सय ५२ जना पीडित भएका छन् । प्रदेश १ का १४ वटा जिल्लामा इन्सेक प्रतिनिधिले सन् २०१९ को जनवरीदेखि डिसेम्बरसम्म अभिलेखीकरण गरेका घटनामा ८ सय ५२ जना पीडित भएको इन्सेक प्रदेश संयोजक सोमराज थापाले जानकारी दिए ।

इन्सेक अभिलेखीकरणका आधारमा सन् २०१९ मा गिरफ्तारीका घटनामा ८३ जना, महिला अधिकार उल्लंघनका घटनामा ३ सय ३५ जना, हत्या घटनामा ७७ जना, बालअधिकार उल्लंघनका घटनामा ३ सय १ जना पीडित भएका छन् । जसमा राज्य पक्षबाट २ जनाको हत्या, ४ जनामाथि कुटपिट, ६ जना कुटपिटबाट घाइते, ८३ जना गिरफ्तार, अभिव्यक्ति, भेला तथा सङ्गठित हुने अधिकारबाट एक जना र हिरासत थुनुवामा एक जनाको मृत्यु भएको उल्लेख छ ।

सन् २०१८ मा प्रदेश १ मा ७ सय ८७ जना मानवअधिकार उल्लंघन र ज्यादतीका घटनामा पीडित भएका थिए । जसमा राज्य पक्षबाट ६१ जना पीडित भएका थिए । महिलाअधिकार उल्लंघनका घटनामा ४ सय १९ जना, जातीय विभेदका घटनामा ४ जना, गिरफ्तारीका घटनामा ४३ जना, बालअधिकारका घटनामा २ सय ३९ जना पीडित भएको इन्सेकले अभिलेख गरेको थियो । सन् २०१९ मा भोजपुरमा प्रहरीको गोलीबाट २ जनाको मृत्यु र झापामा १ जनाको हिरासतमा मृत्यु भएको तथ्यांक इन्सेकको प्रतिवेदनमा उल्लेख छ ।