विराटनगर, ३१ वैशाख । कोरोना भाइरसको संक्रमणबाट मोरङमा थप नौ जनाको मृत्यु भएको छ । मोरङका विभिन्न तीनवटा अस्पतालमा शुक्राबार विहान सात र विहिबार विहान दुई जना कोरोना संक्रमित भएको हो । विराटनगरस्थित नोबेल शिक्षण अस्पतालमा चार, कोसी अस्पताल कोभिड–१९ उपचार केन्द्रमा तीन र मोरङको बूढीगंगा गाउँपालिकास्थित विराट शिक्षण अस्पतालमा दुई जनाको मृत्यु भएको हो ।

नोबेल शिक्षण अस्पतालमा सुनसरीको धरान–१ का ३८ वर्षीय पुरुष, विराटनगर महानगरपालिका–१६ की ७४ वर्षीया महिला, धनकुटा जोरपाटीका ५६ वर्षीय पुरुष र महोत्तरी घर भएका ७७ वर्षीय पुरुषको मृत्यु भएको अस्पतालका प्रवन्धक नारायण दाहालले जानकारी दिए ।

त्यस्तै विराटनगरस्थित कोसी अस्पताल कोभिड–१९ उपचार केन्द्रमा विराटनगर महानगरपालिका–११ का ३८ वर्षीय पुरुष, विराटनगर–६ का ५६ वर्षीय पुरुष र सुनसरीको इटहरी उपमहानगरपालिका–५ का ७९ वर्षीय पुरुषको मृत्यु भएको सुचना अधिकारी अनुपम राजवंशीले जानकारी दिए ।

त्यस्तै मोरङको बूढीगंगास्थित विराट शिक्षण अस्पतालमा विराटनगर–९ का ४९ वर्षीय पुरुष र विराटनगर–६ का ६४ वर्षीय वृद्ध पुरुषको मृत्यु भएको विराटका कोभिड अस्पताल इन्चार्ज सुनील देवले जानकारी दिए ।