कोभिड-१९ संक्रमितलाई आवश्यक पर्ने रेम्डेसिभिरलाई कालोबजारी गर्ने एक व्यक्ति काठमाडौंको बसुन्धराबाट पक्राउ परेका छन् । ३० हजार पर्ने ६ थान रेम्डेसिभिर १ लाख २० हजारमा बिक्री गर्न खोज्ने गोरखा आरुघाट-४ भर भई काठमाडौंको टोखा बस्ने २५ वर्षीय रफिक मियालाई महानगरीय अपराध महाशाखाको टोलीले पक्राउ गरेको हो ।

रेम्डेसिभिरको कालो बजारी भइरहेको सूचनाका आधारमा खोजतलास गर्दा मियालाई पक्राउ गरिएको एसपी महाशाखाका प्रवक्ता कृष्णप्रसाद कोइरालाले जानकारी दिए । महाशाखाका अनुसार ६ थान रेम्डेसिभिरको मूल्य करिब ३० हजार पर्नेमा १ लाख २० हजारमा बिक्री गर्न बार्गेनिङ गरी औषधिसहित बसुन्धरामा बिक्री गर्न आएका बेला मियालाई नियन्त्रणमा लिइएको हो ।

मियाले महाराजगञ्जस्थित नीलकण्ठ लम्सालको नाममा दर्ता रहेको सेवक फर्माका दीपक ढकालसँगको मिलेमतोमा उक्त औषधि ल्याएको खुल्न आएको महाशाखाले जनाएको छ । ढकाल फरार रहेकाले उक्त फर्मा सिल गरी थप अनुसन्धान तथा खोजी भइरहेको प्रहरीले जनाएको छ ।

उक्त औषधि कोभिड-१९ संक्रमितको उपचारका लागि तोकिएका अस्पतालहरूलाई स्वास्थ्य मन्त्रालयमार्फत उपलब्ध गराइने गरेको छ । उक्त औषधि के कसरी औषधि पसलसम्म पुर्‍याइयो र यस प्रकरणमा अन्य क-कसको संलग्नता छ भन्ने विषयमा थप अनुसन्धान भइरहेको महाशाखाले जनाएको छ ।