सिरहामा बोक्सी भन्दै महिलालाई मलमूत्र खुवाएको घटनाको विषयमा समाचार संकलन गर्न गएका पत्रकारमाथि पीडक भनिएकाे पक्षले गालीगलाैज गर्दै कुटपिटकाे धम्की दिएकाे छ । पत्रकारमाथि भएकाे यसखाले दुर्व्यवहारप्रति आपत्ति जनाउँदै पत्रकार महासंघ सिरहाले दाेषीलाई कारबाही माग गरेकाे छ ।

महासंघले आइतबार एक विज्ञप्ति जारी गर्दै रिपाेर्टिङका लागि गएका पत्रकारमाथि भएको दुर्व्यवहारकाे निन्दा गरेको हो । शनिबार बिहान औरही गाउँपालिका-५ की ५० वर्षीया हीरादेवी साहलाई बोक्सीको आरोप लगाउँदै कुटपिटपछि मलमूत्र खुवाइएको थियो । गाईलाई टुना गरेर मारेको भन्दै हीरादेवीलाई जेठाजुका छोरा घुरन साहले कुटपिट गर्दै भुइँमा लडाएपछि बुहारीहरू कौशिला, निशा र कविताले मानव मलमूत्र खुवाएका थिए ।

त्यसपछि त्यो घटना गाउँमै मिलाउन खोजिएको थियो । पीडितलाई प्रहरीमा नजान गाउँका कतिपयले दबाब दिएका थिए । सोही घटनाबारे बुझ्न शनिबार दिउँसो स्थानीय पत्रकार सुरेन्द्रकुमार कामती र शुभनारायण कामती घटनास्थल पुगेका थिए ।

घटनाबारे बुझ्न खोज्दा आरोपित पक्षका रामचन्द्र साहले दुर्व्यवहार गरेका पीडित पत्रकारहरूले बताएका छन् । घटना गाउँमै मिलाउने तयारी भइरहेका बेला आफूहरू त्यहाँ पुगेपछि घटना बाहिरिने र कारबाही हुने डरले साहले तथानाम गाली गर्दै कुटपिट गर्ने धम्कीसमेत दिएका पत्रकारद्वयकाे भनाइ छ ।

रामचन्द्रले ज्यान मार्न धम्कीसमेत दिएकाे पत्रकार सुरेन्द्रले बताए । रामचन्द्रले आक्रमण गर्न लागेपछि उनीहरूले प्रहरीलाई खबर गरेका थिए । त्यसपछि पत्रकारद्वय त्यहाँबाट निस्केका थिए ।

दुर्व्यवहार घटनाको भोलिपल्ट महासंघ सिरहाका अध्यक्ष मनोज बनैताले विज्ञप्ति जारी गरी समाचार संकलन गर्न पुगेका पत्रकारद्वयलाई गालीगलौज र कुटपिटको धम्की स्वतन्त्र प्रेसप्रतिको आक्रमण भएको भन्दै दोषीलाई कारबाही गर्न माग गरेका हुन् ।

मुद्दा दर्ता, एकजना पक्राउ

यता, बोक्सीको आरोपमा कुटपिट गरी जबर्जस्ती मलमूत्र खुवाउने २९ वर्षीय घुरन साहलाई प्रहरीले पक्राउ गरेको छ । घुरन पीडितको जेठाजुका छोरा हुन् । सुरुमा गाउँमै पञ्चायती गरेर घटना मिलाउन प्रयास भए पनि सञ्चारमाध्यममा घटना सार्वजनिक भएपछि प्रहरीले साहलाई पक्राउ गरेको हो ।

प्रहरीले आरोपितविरुद्ध मुद्दा दर्ता पनि गरेको छ । घुरनलाई नियन्त्रणमा लिएर म्याद थप गरी घटनाको थप अनुसन्धान भइरहेको सिरहाका प्रहरी प्रमुख एसपी सुदिपराज भण्डारीले जानकारी दिए । पत्रकारमाथि भएकाे दुर्व्यवहार सन्दर्भमा उनले पत्रकारहरूले उजुरी लिएर आए दुर्व्यवहार गर्नेलाई कानुनी कारबाही हुने बताए ।