सिद्धबाबालाई थुनामा राख्न माग गर्दै उच्च अदालतमा निवेदन - News Birat

सिद्धबाबालाई थुनामा राख्न माग गर्दै उच्च अदालतमा निवेदन

न्यूज विराट

विराटनगर, पुस २५–बलात्कार अभियोग लागेका कृष्णदास गिरी (सिद्धबाबा) साधारण तारेखमा रिहा हुन पाऊँ भन्दै उच्च अदालत विराटनगर पुगेका छन् । बलात्कार अभियोग लागेका सिद्धबाबालाई जिल्ला अदालत मोरङले गत १४ पुसमा ३ लाख रुपैयाँ धरौटीमा रिहा गर्ने आदेश दिएको थियो । जिल्ला अदालतको आदेशअनुसार धरौटी तिरेर रिहा भएका सिद्धबाबा आफूलाई धरौटी नलिई साधारण तारेखमा रिहा गरिदिन मागसहित उच्च अदालत विराटनगर पुगेका हुन् ।

उता सिद्धबाबालाई थुनामा राखेर मुद्दाको सुनुवाइ प्रक्रिया अघि बढाउन माग गर्दै सरकारी वकिलको कार्यालयले पनि उच्च अदालतमा निवेदन दिएको छ । थुनामा पठाउनुपर्ने अभियुक्तलाई धरौटीमा छाड्ने जिल्ला अदालतको आदेश बदर गरी थुनामा राख्नुपर्ने माग सरकारी वकिलको छ । दुवै पक्षबाट निवेदन परेपछि उच्च अदालत विराटनगरले दुवैको निवेदनलाई एकसाथ राखेर सुनुवाइ गर्ने भएको छ । उच्च अदालतले आगामी बिहीबार यो विवादमा सुनुवाइ गर्ने बताएको छ ।

आफू सिद्धबाबाबाट बलात्कृत भएको भन्दै एक महिलाले गत १० मंसिरमा जिल्ला प्रहरी कार्यालय, सुनसरीमा उनीविरुद्ध जाहेरी दिएकी थिइन् । जाहेरीपछि प्रहरीले उनलाई पक्राउ गरे पनि बिरामीको बहाना बनाउँदै लामो समय अस्पताल बसेका थिए । धरौटीमा रिहा भएलगत्तै उनी अस्पतालबाट समेत डिस्चार्ज भएका थिए ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles