काठमाडौं, चैत्र ५-नेकपा (एमाले) का नेता माधवकुमार नेपाल पक्षमा रहेका सांसदले विद्रोह गरेर पार्टीले बोलाएको संसदीय दलको बैठकमा सहभागी भएका छन् । अध्यक्ष समेत रहनु भएका प्रधानमन्त्री केपी शर्मा ओलीको एक्सनपछि माधव पक्षका सांसद पार्टीले बोलाएको संसदीय दलको बैठकमा सहभागी हुन बालुवाटार पुग्नु भएको हो ।
पार्टीका वरिष्ठ नेता झलनाथ खनाल र माधवकुमार नेपाल भने उपस्थित हुनु भएको छैन । उहा आफ्नो गुटको भेलामा सहभागी हुनु भएकाले नआएको बताइएको छ । यसअघि ललितपुरको सानेपास्थित हेरिटेज गार्डेनमा भेला भएर छलफल गरेपछि सांसदहरु बालुटारमा बोलाइएको संसदीय दलको बैठकमा जान तयार भएका हुन् ।
बैठकमा नजान झलनाथ खनाल र नेता नेपाल निर्देशन दिएपनि सांसदले पार्टीको बैठकमा जान पाउनुपर्ने भन्दै विद्रोह गरेका थिए । पार्टी एक नै रहेको र संसदीय दल पनि एकै रहेको भन्दै केही सांसदहरूले संसदीय दलको बैठकमा सहभागी हुनुपर्ने बताएका थिए । केही सांसदहरूले ओलीले बोलाएको बैठकमा भाग लिनुपर्ने बताएपछि खनाल–नेपालले बैठकमा जाने भए जानुस् भनेको एक सांसदले जानकारी दिनुभयो । उहाका अनुसार मन लाग्ने आजको बैठकमा सहभागी भएको र अर्को बैठकदेखि नियमित रुपमा सहभागी हुने निर्णय भएको बताउनु भयो । निक्कै सानो संख्यामा मात्र सांसद भएपछि नेपाल पक्ष अन्तत बैठकमा जानुपर्ने आवाज उठेको थियो ।
हाल कायम रहेका १२० सांसद मध्ये नेपाल पक्षमा मुस्किलले दुई दर्जन रहेको बताइएको छ । ति मध्येपनि अधिकाशंले पार्टीको आधिकारीक बैठक भएकाले जानुपर्ने र नजाने भए आफुहरु जाने भनेर विद्रोह गरेपछि नेपाल हच्किनु भएको थियो ।
