भारतका विदेशमन्त्री एस जयशंकरले नेपालसँगको सम्बन्ध सुधार गरेरअघि बढ्ने समझदारी भइसकेको बताएका छन् । विगतमा नेपाल-भारतबीचको सम्बन्धमा समस्या देखा परेको उल्लेख गर्दै उनले आगामी दिनमा सम्बन्ध सुधार गरेर अघि बढ्ने संकेत पछिल्ला केही साताले देखाएको बताए ।

भारतको पत्रिका द हिन्दू पत्रिकालाई दिएको अन्तर्वार्तामा जयशंकरले नेपाल र भारतको आफ्नै राजनीति भएका कारण समस्या पनि रहेको उल्लेख गर्दै उनले अब आपसी समस्याहरूको हल गरेर अघि बढ्ने बताए ।

‘एउटै घटनालाई मूल्याङ्कनको अन्तिम आधार मानिनु हुँदैन । समस्या नभएका संसारमा कुनै पनि छिमेकी हुँदैनन् । आज हाम्रा अधिकांश छिमेकी देशहरू लोकतान्त्रिक छन् । उनीहरूको आफ्नै राजनीति र हाम्रो आफ्नै राजनीति भएकाले समस्या छन्,’ उनले भनेका छन्, ‘यस्ता समस्या हल गर्न केही वर्षसम्म पनि लाग्न सक्छ । त्यसपछि समस्या समाधान हुँदै जाने हुन्छ ।’

द हिन्दुका लागि पत्रकार सुहासिनी हैदरले लिएको अन्तर्वार्तामा जयशंकरलाई नेपालको संविधान जारी भएपछिदेखि सुरु भएको समस्या, नेपालले लिम्पियाधुरा, लिपुलेक र कालापानीसहितको नक्सा जारी भएको र त्यसमा भारतको असहमति देखिए पनि पछिल्ला दिनमा भारतीय अधिकारीहरूले धमाधम नेपाल भ्रमण गरेको विषयमा प्रश्न गरेकी थिइन् ।

जसको उत्तरमा उनले समस्या अझै पनि हुन सक्ने र समस्या नभएका छिमेकी नहुने भन्दै पछिल्लो समयमा दुई देशबीचका मुद्दाहरूलाई समाधान गर्दै साझा विन्दु पत्ता लगाएर सम्बन्धको दरारलाई कम गर्न केन्द्रित हुनुपर्ने बताएका छन् । उनले नेपाल र भारतले पनि समस्या समाधान गरेर अघि बढ्ने निर्णय गरेको भन्दै यो दुवै देशको हितमा भएको बताए ।

भारतले गत नोभेम्बरमा जम्मु काश्मिर र लद्दाखलाई अलग केन्द्र शासित राज्यका रूपमा उल्लेख गर्दै नयाँ नक्सा जारी गर्दा नेपाली भूमि लिपुलेक, लिम्पियाधुरा र कालापानीसमेत समेटेपछि केही महिनाअघि मात्रै नेपालले यी क्षेत्र समेटेर आफ्नो नक्सा जारी गरेको थियो ।

नेपाल र भारत दुवै देशले एक अर्काका नक्सालाई अस्वीकार गर्दै आफ्नो नक्सा जारी गरेपछि समस्या देखिएको थियो । नेपालले तत्काल वार्तामार्फत समस्या समाधान गर्न चाहे पनि भारतले कोभिडको महामारी भन्दै वार्ता गर्न नमानेपछि दुई देशबीचको सम्बन्धमा चिसोपना आएको थियो । तर पछिल्ला दुई महिनायता रअ प्रमुख सामन्तकुमार गोयल, सेना प्रमुख मनोज मुकुन्द नरवणे र विदेशसचिव हर्षवद्र्धन शृङ्गलाले नेपाल भ्रमण गरेका छन् ।