कोरोना भाइरसको संक्रमणका कारण प्रदेश १ मा थप दुई जनाको मृत्यु भएको छ । सुनसरीको धरानस्थित बीपी कोइराला स्वास्थ्य विज्ञान प्रतिष्ठानमा एक युवती र विराटनगरस्थित नोबेल शिक्षण अस्पतालमा एक पुरुषको मृत्यु भएको हो ।

बीपी कोइराला स्वास्थ्य विज्ञान प्रतिष्ठानमा महोत्तरीको बर्दिवास–२ की २२  वर्षीया युवतीको आइतबार बिहान २ बजेर ५० मिनेटमा मृत्यु भएको हो । उनको पीसीआर परीक्षण गराउँदा २ मंसिरमा कोरोना पोजिटिभ देखिएपछि आइसोलेसनमा भर्ना गरेर उपचार सुरु गरिएकोमा उपचारकै क्रममा मृत्यु भएको हो ।

स्वास्थ्यमा समस्या देखिएसँगै उपचारका लागि भर्ना भएकी उनलाई जनकपुर सिटी अस्पतालले थप उपचारका लागि प्रतिष्ठान रेफर गरेको प्रतिष्ठानले जनाएको छ ।

त्यस्तै विराटनागरस्थित नोबेल शिक्षण अस्पतालमा कोरोना संक्रमणकै कारण मोरङको उर्लाबारीका एक पुरुषको गएराति मृत्यु भएको छ । नोबेल शिक्षण अस्पतालमा उपचारका क्रममा शनिबारराति उर्लाबारी नगरपालिका–५ का ५५ वर्षीय पुरुषको मृत्यु भएको हो ।

अस्पतालका प्रबन्धक नारायण दाहालका अनुसार पेट दुख्ने, वान्ता हुने, ज्वरो आउने, छात्ती दुख्ने लगायतका समस्या देखिएपछि ४ मंसिरमा मृतक पुरुषलाई अस्पताल भर्ना गरिएको थियो । उनको स्वाब संकलन गरेर पीसीआर परीक्षण गराउँदा ५ मंसिरमा रिपोर्ट पोजिटिभ देखिएको थियो । कोरोना पुष्टि भएपछि आइसोलेसनमा भर्ना गरिएका पुरुषको उपचारका क्रममा शनिबार राति ११ बजे मृत्यु भएको अस्पतालले जनाएको छ ।

योसँगै प्रदेश १ मा कोरोना संक्रमणका कारण मृत्यु हुनेको संख्या तीन सय ७० पुगेको छ । जसमध्ये चार महिला र २३ पुरुष प्रदेश १ बाहिरका रहेका छन् ।