एजेन्सी, ११ मंसिर-विश्व फुटबलका महान हस्ती पेलेले अर्जेन्टिनी महान फुटबलर डिएगो म्याराडोनाको निधनप्रति भावुक श्रद्धान्जलि व्यक्त गरेका छन् । ब्राजीललाई ३ पटक विश्वकपको उपाधि दिलाएका पेलेले श्रद्धान्जलि व्यक्त गर्दै भनेका छन्, ‘एक दिन आकाशमा कतै म्याराडोनासँग फुटबल खेल्नेछु ।’

म्याराडोनाको बुधबार हृदयघातका कारण निधन भएको हो । पेलेले ट्विट गर्दै म्याराडोनाको निधनमा गहिरो दुःख व्यक्त गरेका छन् । उनले लेखेका छने, ‘मैले एक राम्रो साथी र संसारले एक महान् खेलाडी गुमाएको छ । मलाई धेरै भन्न मन लागेको छ । तर यति भन्छु कि उनको परिवारलाई धैर्य धारण गर्ने शक्ति ईश्वरले प्रदान गरुन् । आशा छ एक दिन आकाशमा कतै हामी सँगै फुटबल खेल्न पाउनेछौं ।’

पेले र म्याराडोना एक अर्काको खेलका प्रशंसक थिए । दुई महान खेलाडीबीच उमेरमा २ दशकको अन्तर रहेपनि उनीहरु असल साथी थिए । फुटबललाई चर्चित र लोकप्रिय खेलका रुपमा स्थापित गर्नका लागि दुवैको योगदानलाई महत्वपूर्ण मानिन्छ । तर दुवैले त्यसको श्रेय एक अर्कालाई दिने गर्दथे ।