सप्तरी, २६ असोज-एक महिलाको हत्या आरोपमा सप्तरी प्रहरीले तीन जना व्यक्तिलाई पक्राउ गरेको छ । पक्राउ पर्नेमा सप्तरीको आरोपमा मैनाकडीका २१ वर्षीय अजय कुमार राउत, ५२ वर्षीय राधे भन्ने ओमप्रकाश यादव र कञ्चनपुर- २१ ठेलीया बस्ने ५५ वर्षीय बमबहादुर साह रहेका छन् ।

तिरहुत गाउँपालिका- २ मैनाकडरी बस्ने ५० वर्षीया दाइमन यादवको हत्या आरोपमा उनीहरूलाई पक्राउ गरिएको प्रदेश प्रहरी कार्यालय प्रदेश- २ का प्रवक्ता एवं प्रहरी उपरीक्षक कृष्ण प्रसाईले जानकारी दिए । १० असोजका दिन दाइमन एक्लै घरमा बसेको अवस्थामा आरोपीहरूले भुईमा लडाएर डोरीले घाँटी कसेर हत्या गरेको खुल्न आएको प्रहरीले जनाएको छ ।

मृतक महिलाकी देवरानी र ओमप्रकाशबीच अनैतिक सम्बन्ध रहेको कुराबारे दाइमनले थाहा पाएपछि उनको हत्याको योजना बनाएको खुल्न आएको प्रहरीले जनाएको छ । अजय यादव र मृतकबीच जग्गा विवाद पनि रहेकोले बम बहादुरलाई संलग्न गराई ३ जनाले हत्या गरेको प्रहरीले जनाएको छ ।