सुनसरी, २१ भदौ–सुनसरीमा गएको २४ घण्टामा ६१ जना सैनिकसहति ७८ जनामा कोरोना भाइरसको संक्रमण देखिएको छ । धरानमा मात्र २ वर्षीया बालिकासहित ७० जनालाई कोरोना संक्रमण पुष्टि भएको जिल्ला स्वास्थ्य कार्यालय सुनसरीले जनाएको छ ।

कोरोना संक्रमित हुनेमा धरान १३ स्थित फुस्रे आर्मी क्याम्पका ६१ सेनाका जवान रहेका छन् । यस्तै २ वर्षीया बालिका सैनिककै छोरी हुन् । त्यसबाहेक इलाका प्रहरी कार्यालय धरानका २ प्रहरी र ६ जना विभिन्न अभियोगमा पक्राउ परेका थुनुवाहरुलाई पनि कोरोना पुष्टि भएको छ ।

बीपी कोइराला स्वास्थ्य विज्ञान प्रतिष्ठानमा स्वाब संकलन गरी पीसीआर परीक्षण गर्दा उनीहरु सबैलाई कोरोना पुष्टि भएको हो । धरान उपमहानगरपालिका स्वास्थ्य शाखा प्रमुख उमेश मेहताका अनुसार धरानमा एकैदिन यतिधेरै संक्रमण देखिएको पहिलो घटना हो । उहाँका अनुसार धरानमा मात्र कोरोना संक्रमितको संख्या २ सय ७५ गेको छ ।

यस्तै इटहरी उपमहानगरपालिकाका ७ जनामा कोरानो देखिएको छ । इटहरीमा ५ जना महिला र २ जना पुरुषमा कोरोना देखिएको हो । योसँगै सुनसरीमा थप ७८ जनामा कोरोना देखिएको स्वास्थ्य कार्यालय सुनसरीका कोभिड १९ का फोकल पर्सन सिर्जना लिङ्थेपले जानकारी दिइन् । योसँगै सुनसरीमा कोरोना संक्रमितको कुल संख्या ९ सय ८० पुगेको छ । जसमध्ये ४ सय १७ जना निको भएका छन् भने ६ जनाको मृत्यु भएको छ ।