विराटनगर, ११ भदौ–सुनसरीको धरनस्थित वीपी कोइराला स्वास्थ्य विज्ञान प्रतिष्ठान धरानमा कोरोना संक्रमणबाट एक जनाको मृत्यु भएको छ । प्रदेश २ को सिराहा नगरपालिका–२ का ५५ वर्षिय पुरुषको बिहिबार साँझ पौने ७ बजे उपचारका क्रममा मृत्यु भएको हो ।

प्रतिष्ठानका प्रवक्ता डा. निदेश सापकोटाका अनुसार मृतकका परिवारले भदौ ६ गते अत्यधिक खोकी, श्वास प्रश्वासमा समस्या र ज्यरो आएर अस्पताल ल्याएकोमा भर्ना गरि पिरिआर परिक्षण गर्दा ७ गते कोरोना पोजेटिभ देखिएपछि प्रतिष्ठानको आइसोलेसनमा उपचार सुरु गरिएको थियो ।

उनले अवस्था खराब भएपछि २ दिनदेखि प्रतिष्ठानको कोभिड–१९ अस्पतालको आइसियुमा उपचार गरिएका मृतक पुरुष दिर्घ रोगी रहेको बताए । प्रवक्ता डा. सापकोटाले उच्च रक्तचाप र २० वर्ष अघि टिबि रोगको औषधि १८ महिना सेवन गरेका उनको आइसियुमै उपचारका क्रममा मृत्यु भएको जानकारी दिए ।