शनिबारको कोभिड-१९ सम्बन्धी नियमित पत्रकार सम्मेलनमा स्वास्थ्य तथा जनसंख्या मन्त्रालयका प्रवक्ता प्रा. डा. जागेश्वर गौतमले सुनसरीकी ६ वर्षीया बालिकासहित ९ जनाको कोरोना संक्रमणबाट मृत्यु भएको पुष्टि गरे ।

उनका अनुसार पर्सामा एकै दिन ३ जनाको मृत्यु भएको छ । पर्साका ६१, ५८  र ४८ वर्षीय पुरुषको कोरोना संक्रमणबाट मृत्यु भएको हो । यस्तै, सुनसरीमा कोरोना संक्रमणबाट २ जनाको मृत्यु भएको छ । यहाँ ६ वर्षीय बालिका र ६७ वर्षीय पुरुष मृत्यु भएको हो ।

यसैगरी, बारामा ५८ वर्षीय, सिरहामा ६८ वर्षीय, मकवानपुरमा ५६ वर्षीय, भक्तपुरमा ७३ वर्षीय पुरुषको कोरोनाबाट निधन भएको उनले बताए । योसँगै देशभर अहिलेसम्म कोरोनाबाट मृत्यु हुनेको संख्या १४६ पुगेको छ । कुल संक्रमितमध्ये ०.५ प्रतिशतको कोरोनाबाट मृत्यु भएको उनले बताए ।