विराटनगर, ६ भदौ-लकडाउन प्रभावकारी नभएर दिनप्रतिदिन प्रदेश राजधानी विराटनगर र आसपासका स्थानीय तहमा समुदायमा कोरोना संक्रमण तिब्र गतिमा फैलिँदै गएपछि प्रशासनले निषेधाज्ञा जारी गरेसँगै सुनसान देखिएको छ ।

जिल्ला प्रशासन कार्यालय मोरङले विराटनगर लगायत अन्य ३ स्थानीय तहमा पाँच दिने निषेधाज्ञा जारी गरेसँगै सुनसान देखिएको हो । शुक्रबार बसेको जिल्ला सुरक्षा समितिको बैठकले कोरोना भाईरसको बढ्दो संक्रमण रोकथाम तथा न्युनीकरणका लागी निषेधाज्ञानै जारी गरेपछि अधिकांश स्थान सुनसान देखिएको छ भने कतिपय स्थानमा स्थानीयले निषेधाज्ञाको बेवास्ता गर्दै भिडभाड गरेका हुन् ।

निषेधाज्ञाको पहिलो दिन लकडाउनको तुलनामा चहल पहल निकै कम भएको छ । अत्यावश्यकिय सवारी साधन र पशल मात्र खुलेका छन् भने अन्य ठप्प रहेको छ । शनिबार विहानै केही स्थानमा भिड लागेको छ । नगरका केही स्थानमा दुध, खाद्यान्न खरिद गर्न मानिसहरुको भिड लागेको थियो ।

यस अघि निषेधज्ञाको पूर्वसन्ध्यामा पनि अन्य दिनको तुलनामका अत्याधिक भिड थियो । जिल्ला सुरक्षा समितिको बैठकले शुक्रबारदेखि भदौ १० गते मध्यरातिसम्मका लागि निषेधाज्ञा जारी गरेको छ ।

बैठकको निर्णय बमोजिम शुक्रबार मध्यरातदेखि विराटनगर महानगरपालिका, बुढिगंगा गाउँपालिकाको वडा नम्बर १,२, ३, र ४, कटहरी गाउँपालिकाको वडा नम्बर १ देखि ५ सम्म, र रंगेली नगरपालिकाको ४ देखि ७ सम्मका वडामा पनि निषेधाज्ञा जारी गरिएको मोरङका प्रमुख जिल्ला अधिकारी कोषहरी निरौलाले जानकारी दिए ।

तस्बीरहरुः ब्रम्हदेव यादव