यस प्रदेशअन्तर्गतका ८ वटै जिल्लाबाट कोरोनाको संक्रमणको चपेटामा परेको छ । सोमध्ये सबैभन्दा बढी पर्सा जिल्ला मारमा परेको देखिएको छ । सो जिल्ला कोरोनाबाट २५ जनाको मृत्यु भइसकेकाे छ भने दोस्रो धनुषा जिल्लामा ९ जनाको मृत्यु भएको छ ।

त्यस्तै, बारामा ६, सप्तरीमा ४, रौतहटबाट ३, महोत्तरी र सिरहाबाट २-२ र सर्लाही जिल्लामा १ जनाको कोरोना संक्रमणबाट मृत्यु भएको सामाजिक विकास मन्त्रालयले जनाएको छ । बिहीबार अपराह्नसम्म यस प्रदेशमा कोरोना संक्रमितको सङ्ख्या ८ हजार ६३ पुगेको छ । सोमध्ये ३ हजार ९ सय ८४ जना उपचार गराई घर फर्केका छन् भने ३ हजार ८ सय ९५ जनाको उपचार भइरहेको छ ।

प्रदेशमा स्वाबको नमूना सङ्कलन कार्य तीव्र रुपमा भइरहेको छ । अहिलेसम्म ८५ हजार ७ सय ६४ को स्वाबको नमूना सङ्कलन गरिएको छ । सङ्कलित स्वाबमध्ये ७२ हजार ७ सय ८९ जनाको रिपोर्ट नेगेटिभ आएको छ भने ४ हजार ९ सय १२ जनाको रिपोर्ट आउन बाँकी रहेको मन्त्रालयले जनाएको छ ।

भारतबाट आउने वा सशङ्कित व्यक्तिका लागि यस प्रदेशमा निर्माण गरिएको २ सय १७ वटा क्वारेन्टाइनमा १३ हजार ७ सय ४८ वटा शय्याको व्यवस्था गरिएको छ । ती क्वारेन्टाइनमा १ हजार ३ सय २७ जनालाई राखिएको छ भने होम क्वारेन्टाइनमा २ हजार १ सय ८८, आइसोलेसनमा ४ सय ६१ र होम आइसोलेसनमा ७ सय ६२ जना बसेका छन् ।

८ वटै जिल्लाको सिमाना भारतसँग जोडिएको छ । भारतमा कोरोना संक्रमण तीव्र रूपमा फैलिएको छ । सिमानामा आवतजावतमा रोक लगाइएको भए पनि लुकिछिपी भित्रिने व्यक्तिमध्ये कतिपय कोरोनाबाट संक्रमित पाइएका छन् । त्यस्ता व्यक्तिहरु परिवारमा घुलमिल गरेर बसेपछि कोरोनाको संक्रमण ह्वात्तै बढेको देखिएको छ । (रासस)