जनकपुरधाम, २ भदौ-प्रदेश २ मा पछिल्लो २४ घण्टामा ३ सय २४ जनामा कोरोना भाइरस संक्रमण पुष्टि भएको छ । योसँगै प्रदेशमा संक्रमितको संख्या साढे सात हजार पुगेको छ । त्यसमध्ये ३ हजार ६ सय ६३ जना सक्रिय संक्रमित छन् भने ४७ जनाको मृत्यु र बाँकी उपचार पश्चात निको भइ घर फर्किसकेका छन् ।

मंगलवार सबैभन्दा बढी पर्सामा १ सय २४, बारामा ५९, धनुषामा ५४, रौतहटमा ४४, सप्तरीमा १४, महोत्तरीमा १३ र सर्लाहीमा ३ जनामा संक्रमण पुष्टि भएको समाजिक विकास मन्त्रालयले जनाएको छ ।

मन्त्रालयका वरिष्ठ चिकित्सक डा.कमलेश प्रसाद यादवका अनुसार आज पुष्टि भएका सबै संक्रमितको अवस्था समान्य छ । मंगलवारसम्म प्रदेशमा संक्रमितमध्ये २ हजार २ सय ५३ होम क्वारेन्टाइन र २ हजार २ सय ४५ जना होम आइसोलेसनमा छन् । यसैगरी ११ सय ३ जना विभिन्न क्वारेन्टाइन र १ हजार ५ सय १८ जना विभिन्न अस्पतालको आइशोलेसनमा उपचाररत रहेको मन्त्रालयले जनाएको छ ।