मन्त्रालयका प्रवक्ता डा. जागेश्वर गौतमका अनुसार मोरङको रंगेली नगरपालिका– ८ का ४५ वर्षीय पुरुषको हिजो मृत्यु भएको हो । ज्वरो र श्वासप्रश्वासमा समस्या आएपछि उपचारका लागि कोसी अस्पताल लैजाँदै गर्दा उनको बाटोमै मृत्यु भएको हो ।

यस्तै, मोरङको विराटनगर महानगरपालिका ४५ पुरुषको पनि कोसी अस्पतालमै हिजो उपचारका क्रममा मृत्यु भएको हो । सर्लाहीको मलंगवा– ८ का ६५ वर्षीया वृद्धाको पनि हिजो नै सशस्त्र प्रहरी बलको अस्पताल बलम्बुमा उपचारका क्रममा निधन भएको उनले बताए ।

यस्तै, धनुषाकाे मिथिला नगरपालिका– १० की ७२ वर्षीया वृद्धाको १७ साउनमा उपचारका क्रममा ओम अस्पताल काठमाडौंमा मृत्यु भएको हो । दम र उच्च रक्तचापकी बिरामी उनमा निमोनियाको पनि समस्या थियो । यस्तै, सप्तरीका ४२ वर्षीय पुरुषको हिजो निधन भएको प्रवक्ता प्रा.डा. गौतमले बताए । योसँगै नेपालमा कोरोनाबाट मृत्यु हुनेको संख्या ६५ पुगेको छ ।