बिहीबार मन्त्रालयको नियमित प्रेस ब्रिफिङमा बोल्दै मन्त्रालयका प्रवक्ता प्रा.डा. जागेश्वर गौतमले काठमाडौं उपत्यकामा कोरोना संक्रमणको दर वृद्धि भइरहेकाले सुरक्षा सतर्कता अपनाउन आमसर्वसाधारण तथा विभिन्न क्षेत्रमा कार्यरत व्यक्तिहरूलाई अनुरोध गरे । उनले अति आवश्यकबाहेक बाहिर ननिस्कन, २ मिटरको दूरी कायम राख्न, अनिवार्य मास्क लगाउन र साबुपानीले नियमित हात धुन आग्रह गरे ।

साथै, अस्पतालहरूलाई कर्मचारीलाई सिफ्टमा काम गराउन र स्वास्थ्यकर्मीलाई अनिवार्य रूपमा जनस्वास्थ्यका मापदण्ड अवलम्बन गराउन तथा त्यसको लकबुक बनाएर राख्नसमेत अनुरोध गरेको छ । उनले कोरोना भाइरसको अहिलेसम्म उपचार र औषधि पत्ता नलागेको उल्लेख गर्दै अक्सिजन र भेन्टिलेटरले सहयोग मात्रै गर्ने भएकाले रोग लाग्न नदिनु नै उत्तम उपचार रहेको बताए ।

मन्त्रालयले सरकारी, गैरसरकारी तथा निजी कार्यालयका बैठक, सेमिनार वा भेला तरुन्त बन्द गर्न र बन्द गर्न नमिल्ने भए भर्चुअल बैठक गर्न अनुरोध गरेको छ । उनले भारतीय सीमाक्षेत्रका जिल्लाहरूमा कोरोना संक्रमणको दर उच्च रहेकाे बताउँदै प्रदेश सरकार, स्थानीय सरकार, गैरसरकारी संस्थालगायतलाई सावधानी अपनाउन अनुरोध पनि गरे ।