बसकाे झ्यालबाट हाम फाल्दा एक जनाकाे मृत्यु - News Birat

बसकाे झ्यालबाट हाम फाल्दा एक जनाकाे मृत्यु

न्यूज विराट

इलामको गोदकमा अनियन्त्रित अवस्थामा रहेकाे बसकाे झ्यालबाट हाम फाल्दा साेही बसले किचिएर एक जनाकाे मृत्यु भएकाे छ । इलाम नगरपालिका–१० गोदकस्थित मेची लोकमार्गमा सोमबार राति १० बजेतिर याे घटना भएकाे हाे ।

ना ४ ख ६२४८ नम्बरको बस बाराबाट इलाम आएको थियो । बसमा ४४ जना सवार रहेको प्रहरीले जनाएको छ ।  दुर्घटनास्थल इलामको तीनघरे नजिक प्रहरी पुग्दा बसको एउटा चक्का नालीमा परेको भेटिएको इलाम प्रहरी प्रमुख एसपी महेन्द्रकुमार श्रेष्ठले जानकारी दिए ।

उनका अनुसार अनियन्त्रित भएर बस कल्भर्टमा ठाेक्किएकाे थियाे । बस अनियन्त्रित रहेकै अवस्थामा झ्यालबाट हाम फालेका बारा सिम्राहगण नगरपालिका–७ का ३५ वर्षीय प्रदीप कुसुवाहकाे साेही बसले च्यापिएर मृत्यु भएकाे एसपी श्रेष्ठले जानकारी दिए ।

उनीसँगै झ्यालबाट हाम फालेका ध्रुब कुसुवाह घाइते छन् । खुट्टा र शरीरका विभिन्न भागमा चोट लागेका उनको झापाको बिर्तामोडस्थित बि.एन्ड.सी अस्पतालमा उपचार भइरहेको छ । बसमा रहेका अन्य यात्रु भने सकुशल छन् । दुर्घटनापछि फरार रहेका चालकको खोजी भइरहेकाे प्रहरीले जनाएको छ ।

मा प्रकाशित

यसमा तपाईको मत:

© Copyright 2017 - 2022 Newsbirat pvt ltd. All Rights Reserved.

Design / Developed by codebundles