विराटनगर, साउन २१–समुदाय स्तरमा कोरोना संक्रमण फैलिएको भन्दै विराटनगर महानगरपालिकाले सबै बैंक तथा वित्तीय संस्थाहरुलाई नियमित कारोबार बन्द गर्न आव्हान गरेपछि बुधबारदेखि सबै वित्तीय संस्थाहरुले आर्थिक कारोबार बन्द गर्न सहमत भएका छन् । महानगरपालिकाले बैंक काउन्टरबाट हुने सेवा बन्द गरी एटिएम प्रवद्र्धन गरी सेवा प्रवाह गर्न आग्रह गरेको थियो ।

सोही अनुसार बुधबार बैंक तथा वित्तीय संस्थाहरुले कारोबार बन्द गर्न सहमत भएको महानगरपालिकाले जनाएको छ । बैंक तथा वित्तीय संस्थाहरुले दुहबी, इटहरी, धरान, बुढीगंगा, विराटनगर तथा रंगेली आदि क्षेत्रमा लकडाउनको अवस्था रहेकोले काम गर्न असहज र जोखिम भएको भन्दै महानगरको प्रस्तावमा सहमत भएकोले आजबाट अर्को सूचना नभएसम्म उनीहरुले कारोवार नगर्ने बताइएको छ ।

बैंक तथा वित्तीय संस्था मात्र नभई सहकारी संस्थाहरुले पनि विराटनगरमा नियमित कारोबार बन्द गरेको जनाएको छ । विराटनगरमा विभिन्न बैंक तथा वित्तीय संस्थाहरुका ८५ वटा शाखा कार्यालयले सर्वसाधारण सेवाग्राहीलाई सेवा दिँदै आएका छन् ।