विराटनगर, साउन ४–सप्तरीको सप्तकोशी नगरपालिकामा प्राबिधिक अनुगमन प्रभावकारी नहुँदा विकासे कामहरु गुणस्तरहित बन्दै गएका छन् । सप्तकोशी नगरपालिकाको वडा नं ४ र ११ मा बनेको पुल र कल्भर्ट क्वालीटि कन्ट्रोल र फितलो अनुगमनका कारण छोटो अन्तरालमै भग्नावशेषमा परिणत भएको छ ।

वडा नं ४ को मयुरनी खाता पुलको पिल्लर स्थानिय तहको चुनाव हुनु अघि नै बनाइएको भएपनि बाँकी निर्माण कार्य आर्थिक बर्ष २०७४/०७५ मा भएको हो। दुइ बर्ष नबित्दै यो पुल भत्कीएको छ । यसमा कमसल रड प्रयोग भएको देखिन्छ भने मापदण्ड पुरानो भएको सर्व स्वीकार्य छ । पुल भत्किएपछी स्थानियलाई ३ मिनेटको बाटो अब ३० मिनेटको बनेको स्थानिय निर्माण कार्यका जानकार शत्रुधन सदाको गुनासो छ ।

यो घटना अपवाद भने होइन। वडा नं ११ स्थित चिन्तामणी खोला कल्भर्टसमेत भत्किएको छ । सो कल्भर्टमा पानीको बहाव क्षेत्रमा नत ढलान भएको छ नत कटअफ वाल र साइड वाल नै बनेको छ। कल्भर्ट भत्केको एक बर्ष बितिसक्दा पनि स्थानियले आवत जावत गर्ने अर्को बिकल्प भेटेका छैनन्। २०७४ को जेठमा बनेर २०७६ असारको बाढीमा भत्केको यो कल्भर्टले २ बर्षको मात्र एक्स्पाईरी डेट पायो। लापरवाहीका कारण कल्भर्ट भत्किएपछि पारिको पश्चिम टोल यतिबेला थला परेको छ ।

वडाध्यक्ष डोलेश्वर खड्काले भने इन्जीनियरबाट गल्ति भएको दावी गरे । वडाध्यक्ष खड्काले कमजोरी जति इन्जिनियरको टाउकोमा राखिदिँदा इन्जिनियरसुदिप चौधरीले अस्विकार गरेका छन् ।

सप्तकोशी नगरको अर्को जटिल समस्या हो ट्याङग्रा खोला पुल। नेपालकै जेठो नहर चन्द्र नगरको पानी निकासका लागि बनाइएको ट्याङग्रा साइफनसर्बत्र चिन्ताको बिषय बनेको छ। पुल भत्कीने अवस्थामा पुगेको छ भने पानी अनियन्त्रीत रुपमा छिमेकी वडाहरुमा पनि प्रवेश गरिरहेको छ।जनताको आक्रोसले यतिबेला सबै वडा त्राहिमाम छन्।

वडा नं. ११ कै नहर छेउको अधुरो हनुमान मन्दिर अनियमितताको अर्को उदाहरण हो। इष्टीमेट अनुसार त्यसमा ८ र १२ एम एमको रड मात्र प्रयोग हुनुपर्नेमा ७ एम एमको रड समेत फेला परेपछि स्थानिय असन्तुष्ट बनेका थिए। यस्तै भगनी चोकबाट कमलपुरजाने कालोपत्रेमा समेत कमसल काम भएको स्थानियको गुनासो छ।

यतिबेला नगरपालिका अख्तियारको मार खेपिरहेको छ। अख्तियारको ठहर अनुसारवडा नं. २ स्थित सिद्धिपुर–सखुवनी रोड निर्माणमा मापदण्ड विपरीत गुणस्तरहीन काम भएको हो। नगरपालिकाका तत्कालीन निमित्त कार्यकारी अधिकृत राजेन्द्र प्रसाद दाहाल, इन्जिनियर सुदिप चौधरी र सव–इन्जिनियर रामकान्त चौधरीले कानूनी प्रक्रिया छली भ्रष्टाचार गरेको अख्तियारको ठहर छ ।

यस्तै, सुन्दर कन्स्ट्रक्सनका प्रोप्राइटर राज कुमार यादव, शान्ति निर्माण सेवाका प्रोप्राइटर नारायण प्रसाद यादव र भष्मरवि निर्माण सेवाका सञ्चालक श्यामकान्त चौधरीले सप्तकोशी नगरपालिकासँग गरेको सम्झौता एवं मापदण्डअनुसारको कार्य नगरेको पनि अख्तियारको ठहर छ।