विराटनगर, चैत १७संघीय सरकारले चीनबाट खरिद गरेर ल्याइएका एक हजार थान पिपिई आज अपरान्ह नेपाली सेनाको एनए ०६३ स्काई ट्रकबाट विराटनगर ल्याइएको छ । संघीय सरकारका प्रतिनिधिले उक्त पिपिइ प्रदेश–१ का सामाजिक विकासमन्त्री जीवन घिमिरेलाई हस्तान्तरण गरेका छन्।

अन्य सामग्री प्राविधिक कारणले स्काई ट्रकमा ल्याउन नसकिएकाले मालबाहक ट्रकमा आइरहेको मन्त्री घिमिरेले बताए । उक्त पिपिई आजै कोरोना संक्रमणको आशंकामा उपचार भइरहेका बिरामीहरुको उपचारमा खटिएका स्वास्थ्यकर्मीलाई वितरण गरिने मन्त्री घिमिरेले जानकारी दिए ।

एक हजार थान पिपिइमध्ये १५०÷१५० को दरले कोशी र बि.पी. कोइराला स्वास्थ्य विज्ञान प्रतिष्ठान धरानमा र बुधबारबाट नेशनल ट्रेडिङको भवनमा सञ्चालन हुने कोरोना अस्पतालमा २ सय र मेची अस्पतालका लागि ४६ थान प्रदान गरिने उनको भनाइ थियो ।

मन्त्री घिघिरेका अनुसार बाँकी पिपिइ प्रदेशस्थित १४ वटै जिल्ला स्वास्थ्य कार्यालयमध्ये मोरङमा ३४, सुनसरीमा २४, धनकुटामा १४, तेह्रथुममा १२, संखुवासभामा २०, भोजपुरमा १८, सोलुखुम्बुमा १६, उदयपुरमा १६, खोटाङमा २०, पाँचथरमा १६, ताप्लेजुङमा १८ र इलाममा २० वटा बितरण गरिनेछ ।