^{भरतपुर, १९ असार-चितवनमा रहेको कलेज अफ मेडिकल साइन्सेसले जग्गा भाडाबापतको भरतपुर अस्पताललाई तिर्नुपर्ने २ करोड ५८ लाख १४ हजार ४ सय २५ रुपैयाँ तिर्न आलटाल गरेको छ ।}

^{सो कलेजले भरतपुर अस्पतालको ९ विगाह जग्गा प्रतिविगाह वार्षिक १ लाख रुपैयाँ तिर्ने गरी सुरुमा भाडामा लिएको थियाे । भरतपुर अस्पतालका लेखा प्रमुख भृगुराज खनालका अनुसार महालेखा परीक्षकको कार्यालयले गत वर्षसम्मको २ करोड २० लाख २३ हजार ७ सय ७० रुपैयाँ तिर्न बाँकी रहेको भन्दै तत्काल असुल गर्न ताकेता गरेको छ ।}

^{यस वर्षको भाडा र पछि थप गरिएको रकमसहित ३७ लाख ९० हजार ६ सुय ५५ रुपैयाँ तिर्न बाँकी छ । अस्पतालले पटकपटक भाडा बुझाउन ताकेता गरेको भए पनि भाडा नउठेको उनले बताए ।} 

^{राष्ट्रिय सतर्कता केन्द्रले अस्पताललाई पत्राचार गरी २ संस्थाबीचको सम्झौताको विस्तृत विवरण माग गरेको छ ।  महालेखा परीक्षकको कार्यालयले पनि स्वास्थ्य विभागमार्फत भाडा असुली तत्काल गर्न अस्पताललाई ताकेता गरिरहेको खनालले जानकारी दिए । विसं २०६२ सालमा सम्झौता हुँदा प्रतिविगाह वर्षको १ लाख, प्रतिवर्ष थप सहयोग १५ लाख र हरेक वर्ष सो रकमको १० प्रतिशतले वृद्धि हुने भनी सम्झौता गरिएको छ}

^{नेपाल सरकारले अस्पतालको नाममा रहेको जग्गा कलेजलाई भाडामा दिने निर्णय गरेसँगै सन् १९९३ मा तत्कालीन शिक्षा, संस्कृति तथा समाजकल्याण मन्त्रालयले इन्टरनेस्नल सोसाइटी फर मेडिकल एजुकेसनसँग सम्झौता गरेको थियो ।} 

^{सो सम्झौतापश्चात् अस्पतालले सम्झौता गरी भाडामा दिएको हो । यसबीचमा अस्पताल र कलेजबीच विभिन्न मितिमा फरकफरक किसिमका सम्झौता हुँदै आएको अस्पतालले जनाएको छ ।} 

^{पछिल्ला वर्षहरूमा भाडा रकम निकै न्यून भएकाले पुनः सम्झौता गर्नुपर्ने माग भरतपुर अस्पतालको भए पनि मेडिकल कलेजले अटेर गर्दै आएको जनाएको छ । अस्पताल विकास समितिका अध्यक्ष डा भोजराज अधिकारीले सो मेडिकल कलेजका आधिकारिक व्यक्ति बाहिर भएकाले कुरा हुन नसकेको भए पनि उनी फर्किएपछि संस्थागत रूपमा बैठक बसी यस विषयको टुङ्गो लगाइने बताए ।} 

^{हाल भरतपुर अस्पतालले एक कट्ठाभन्दा कम जग्गाको मासिक झण्डै ५ लाख भाडा असुल गरिरहेको बेलामा एक विगाहको वार्षिक १ लाख रुपैयाँ भाडासमेत कलेजले नतिरेको हो ।} 

^{अस्पतालले मेडिकल कलेजलाई ४९ वर्षका लागि जग्गा भाडामा दिएको हो । अस्पतालको आफ्नो गुरुयोजनाअनुसार संरचना निर्माणका लागि जग्गा अभाव भइरहेका बेला मेडिकल कलेजले कौडीको भाउमा लिएको जग्गा झाडी बनाएर छोडेको भन्दै सरोकारवालाले विरोध गरिरहेका छन् । रासस}