पोखरा, १९ असार-प्रधानमन्त्री केपी शर्मा ओली नै पदमा रहनुपर्ने माग गर्दै पोखरामा युवाहरूले प्रदर्शन गरेका छन् । शुक्रबार झरीको प्रवाह नगरी पोखराको चिप्लेढुंगामा युवाहरूले प्रदर्शन गरेका हुन् ।

प्रदर्शनमा सहभागीले ‘केपी ओली जिन्दावाद’, ‘नागरिकता विधेयक पारित गर, विदेशी हस्तक्षेप बन्द गर’, ‘आजलाई हाेइन भोलिलाई, ५ वर्ष ओलीलाई, ‘फेर्नु छ चाँडै देशको मुहार, हाम्रो भविष्य हाम्रो सरोकार’, ‘जब रहन्छ चन्द्रसूर्य, डुब्ने छैन हाम्रो स्वाभिमान’ लगायतका नारा लगाएका थिए ।

उनीहरूले  अर्का अध्यक्ष पुष्पकमल दाहाल ‘प्रचण्ड’प्रति इङ्गित गर्दै अँध्यारो कोठेबैठक बसेर ओलीलाई हटाउन लागेको भन्दै आपत्ति प्रकट गरे ।

उनीहरूले जनमतको कदर गर्नसमेत आग्रह गरेका छन् । झरीमा रुझेर कार्यकर्ताले प्रदर्शन गरिरहँदा नेताहरू कोही पनि सहभागी नभएको भन्दै केही समर्थक रुष्ट बनेका छन् ।

प्रदर्शनमा सहभागी नेकपाकै कार्यकर्ता विनोद थापाले अहिलेको परिस्थितिमा सरकार परिवर्तन गर्न नहुने बताउँदै आफूहरू कुनै व्यक्ति र गुटको पक्षमा नरहेकाे बताए । स्वतन्त्र युवा विद्यार्थीको नामबाट सामाजिक सञ्जालमार्फत गरिएको आह्वानअनुसार जम्मा हुनेमा अधिकांश युवा थिए ।