बुटवल, १५ असार-फट्याङग्रा प्रजातिको सलह कीरा लाखौँको संख्यामा कपिलवस्तु जिल्ला प्रवेश गरेका छन् । जिल्ला सदरमुकाम तौलिहवा, पकडी, मर्यादपुर, कृष्णनगर, शिवराज नगरपालिकाका ३ र ११ तथा विजयनगर गाउपालिका लगायतका क्षेत्रका लाखौँ संख्यामा सलह कीरा देखिएका छन् ।

करिब ३ किलोमिटरको क्षेत्रफलमा फैलिएर उड्दै आएका यी सलह कीरा यहाँका विभिन्न बोटविरुवामा बसेका छन् । जिल्लामा धान रोपाइँ सुरु गरेका कृषक र तरकारी उत्पादक कृषक सलह कीरा जिल्लामा प्रवेशबाट निकै निन्तित बनेका छन् । कपिलवस्तु नगरपालिका-५ का वडा अध्यक्ष दीरेप चौधरीले किसानले भर्खर लगाएको खेतमा सलह पसेर रोपेको धान खान थालेको बताए ।

यसरी जिल्लामा भित्रिएका सलह कीरा भगाउन स्थानीय कृषकले धाल बजाएर तथा ठूलो स्वरमा म्युजिक बजाउन सुरु गरेका छन् । प्रतिदिन करिब ५ सय किलोमिटरको दूरीसम्म आहारा खोज्दै यी कीरा आकाशमा उड्ने गरेको विज्ञहरू बताउँछन् । फट्यांग्रा प्रजातिका यी कीराले प्रतिदिन २ ग्राम आहारा खाने गर्छन् ।

तातो हावापानी भएको मरभूमि क्षेत्रबाट उत्पत्ति भई आएका यी कीराको जीवन चक्र ३ महिनादेखि ५ महिनासम्मको हुन्छ । यी कीरा नेपालमा १९६० को दशकमा पनि देखिएका थिए । रूपन्देहीमा भने अहिले सलह देखिएको थिएन ।

सलहबाट बाली जोगाउन प्रोत्साहनस्वरूप प्रदेश सरकारले सलह कीरा छोपर ल्याउनेलाई प्रतिकिलो २० रुपैयाँका दरले दिने निर्णय गरेको छ । हिजो मात्र बुटवलका २ बालबालिकाले साढे ८ किलो सलह छापेर बुटवल उपमहानगरपालिकामा बुझाएका थिए ।