डडेल्धुरा, १३ असार-बैतडीको क्वारेन्टाइनमा खाना पकाउने (भान्से) १ जनाको मृत्यु भएको छ । मृतक  जिल्लाको दशरथचन्द नगरपालिका-६ का ५५ वर्षीय १ पुरुष रहेका छन् ।

मृतक दशरथचन्द नगरपालिका–४ मा रहेको जगन्नाथ बहुमुखी क्याम्पसको क्वारेन्टाइमा बसेकाहरूलाई खाना पकाउने काम गरिरहेको बैतडीका प्रहरी नायव उपरीक्षक नारायणप्रसाद अधिकारीले जानकारी दिए ।

शनिबार बिहान ११ बजे घरमा एक्कासी बिरामी भएका ती व्यक्तिको उपचारको लागि जिल्ला अस्पताल ल्याउँदै गर्दा बाटोमै मृत्यु भएको डीएसपी अधिकारीले जानकारी दिए ।

मृतक ती व्यक्ति  २ महिनादेखि क्वारेन्टाइनमा खाना बनाउने काममा रहेका थिए । क्वारेन्टाइनमा खाना पकाउने व्यक्तिको मृत्यु भएकोले कोरोना परीक्षण गरिने जिल्ला अस्पताल बैतडीका प्रमुख डा. वशन्तराज जोशीले जानकारी दिए ।

मृतकको स्वाब संकलन गरि पिसिआर परीक्षणको लागि धनगढी पठाइने जोशीको भनाइ छ । शव व्यवस्थापन कसरी गर्ने भन्नेबारे छलफल भइरहेको छ ।

आवश्यक प्रक्रिया पुर्‍याएर परिवारकै सदस्यले आफैँले गर्ने भन्ने मानेपछि शव व्यवस्थापन गर्न परिवार दिने नत्र नेपाली सेना व्यवस्थापन गर्ने डा. जोशीले बताए ।