एजेन्सी, असार ११-बेलायतमा कोरोना भाइरसविरुद्धको नयाँ खोपको मानवीय परीक्षणको तयारी गरिएको छ । स्वतस्फूर्त रुपमा खोपको परीक्षणमा सहभागी हुन चाहेकालाई सम्भवित नयाँ खोपको डोज दिने प्रक्रिया सुरु गरिएको वैज्ञानिकहरुले बताएका छन् ।

परीक्षणमा सहभागी हुने व्यक्तिहरुलाई हाल ‘इम्युनाइज्ड्’ गर्न सुरु गरिएको छ । इम्पेरियल कलेज लण्डनका प्राध्यापक रोबिन शाटोक नेतृत्वको टोलीले सो परीक्षणको नेतृत्व गर्दैछ । करिब ३ सय जनालाई आगामी सातादेखि कोरोना भाइरसविरुद्धको सम्भावित खोप दिन सुरु गरिनेछ ।

जनावरमा गरिएको परीक्षणमा खोप सुरक्षित र प्रतिरक्षामा राम्रो काम गर्ने देखिएपछि मानवीय परीक्षण सुरु भएको हो । अक्सफोर्ड विश्वविद्यालयका वैज्ञानिकहरुले तयार पारिरहेको खोपको भने दुई चरणको मानवीय परीक्षणपछि तेस्रो चरणको मानवीय परीक्षणको तयारी भइरहेको छ ।

कोरोना भाइरसविरुद्धको खोपका लागि विश्वभरका वैज्ञानिकहरुले प्रयास गरिरहेका छन् भने १२० वटा खोपमा काम भइरहेको छ । इम्पेरियल कलेजको टिमले बनाएको खोपको पहिलो चरणको परीक्षणको रिपोर्ट आएपछि दोस्रो चरणको मानवीय परीक्षण आगामी अक्टोबरमा सुरु हुनेछ । दोस्रो चरणको परीक्षणमा ६ हजार मानिस सहभागी हुने छन् ।

इम्पेरियल कलेजका वैज्ञानिकहरुले अहिले परीक्षणमा रहेको खोप आगामी वर्षको जनवरीसम्ममा बेलायतसहित अन्य देशमा वितरण गर्न सकिने बताएका छन् ।