एजेन्सी, असार ९-भारतको नयाँ दिल्ली कांग्रेसको कार्यकारी समिति (सीडब्लुसी) को बैठक बसेको छ । पार्टी अध्यक्ष सोनिया गान्धीले चीनको विषयमा सरकारको नीतिको कडा आलोचना गरेकी छन् ।

उनले सीमा क्षेत्रमा अहिले भइरहेको समस्याका पछि भाजपा सरकारको मिस म्यानेजमेन्ट र गलत नीति कारक रहेको आरोप लगाएकी छन् ।  उनले पेट्रोलियम पदार्थको मूल्य वृद्धि तथा कोरोना भाइरसको नियन्त्रणमा सरकार असफल भएको बताइन् ।

उनले भनिन्, ‘कोरोना महामारीमा गलत व्यवस्थापन नरेन्द्र मोदी सरकारको सबैभन्दा भयानक असफलतामा गनिनेछ ।’ चीनसँग बढ्दो तनाव र सीमा समस्यालाई लिएर कांग्रेस र भाजपाबीच चर्को बहस चलिरहेको छ ।

सोनिया गान्धीभन्दा अघि पूर्व प्रधानमन्त्री मनमोहन हिंहले सोमबारमात्रै देशको सुरक्षाको मुद्दामा प्रधानमन्त्री नरेन्द्र मोदीले सोचेर बोल्नुपर्ने भन्दै शब्दमा ख्याल गर्न आग्रह गरेका थिए ।

जवाफमा भाजपा अध्यक्ष जेपी नड्डाले कांग्रेसले भारतलाई ४३ हजार किलोमिटरको भाग चीनलाई सुम्पिएको आरोप लगाएका थिए । मनमोहन सिंह प्रधानमन्त्री हुँदा सन् २०१० देखि २०१३ को बीचमा चीनले ६ सय पटक घुसपैठ गरेको आरोप लगाएका थिए ।